Imphal, Nailur 30 (UNI)
Ka Sorkar Manipur ka la pynjlan ïa ka Armed Forces Special Powers Act (AFSPA) sa na bynta 6 bnai lait noh ki jaka kiba hap hapoh ka jingkhmih jong 19 tylli ki thanat.
U Commissioner ka tnad kam pohïing, u N. Ashok Kumar, u la ong ha ka hukum ba la pynmih ba hapoh ka Section 3 jong ka Armed Forces (Special Powers) Act, 1958 (Act No.28 of 1958), u Lat ka Manipur u ai ka jingmynjur ban pynbna ïa baroh kawei ka Jylla Manipur lait noh ki jaka ba hap hapoh ka jingkhmih jong 19 tylli ki thanat kum ki ‘Disturbed Area’ na bynta 6 bnai naduh ka 1 tarik u Risaw.
Ka hukum ka la ong ba u Lat ka Manipur u ngeit ba ki kam thombor jong ki kynhun lehnoh bapher-bapher ka wanrah ïa ka jingdonkam jong ki tnad ïada ban ïarap ïa ki bor distrik ha baroh kawei ka Jylla jong ka Manipur lait noh ki jaka kiba la pyllait.Ka Sorkar Jylla ka ngeit ba hadien ka jingkhmih bniah ïa ka jinglong-jingman ka shong suk shong shngaiñ hapoh ka Jylla ba kan ym lah ban don ïa ka jingwad jingtip kaba bniah ha madan naba ki tnad ïada ki bunkam haba ïadei bad ka jingpynneh-jingpynsah ïa ka shong suk shong shngaiñ.
Kumjuh, kan dang kloi palat ban poi sha kano-kano ka rai haba ïadei bad kum kane ka mat kaba khluit khlem ka jingwad jingtip kaba bniah; ha kawei ka liang kam ïahap ban khmih bniah ïa ka kyrdan ‘Disturbed Area’ jong ka Jylla ïa mynta. Da kaba buh jingmut ïa kaba la kdew haneng bad ka jinglong-jingman ka shong suk shong shngaiñ hapoh ka Jylla bad ka jinglah jong ki bor synshar ka Jylla, ka Sorkar Jylla ka la rai ban pynneh ïa ka ‘status-quo’ halor ka kyrdan ‘Disturbed Area’ ha ka Jylla Manipur, ka la bynrap.
Ki jaka kiba lait ki dei ki jaka kiba hap hapoh ka khmih ka thanat Imphal, Lamphel, City, Singjamei, Sekmai, Lamsang, Patsoi, Wangoi, Porompat, Heingang, Lamlai, Irilbung, Leimakhong, Thoubal, Bishnupur, Nambol, Moirang, Kakching bad Jiribam.
