Ha ka jinglong briew, ka jingpihuiñ ïa kiwei ka don beit. Kane ka dei ka jinglong basniew, hynrei ka bym lah pat ban pynduh. Ka daw jong ka jingbymlah ban pynduh ïa kane ka dei kata: Ka jinglong briew. Kane ka jingpihuiñ ka pynlong ïa ngi ki briew ban duna noh ha ka jingmut jingpyrkhat, ha ka jingbishar ïa kiei-kiei lane ha ka jingpynshong nongrim ïa ki mat ki jura. Ka kah dum ïa ka jingproh jabieng, ka jingsngewthuh bad ka pynlehraiñ hakhmat ka pyrthei. Ka long kaba ithamula ban peit ïa ki briew kiba don ïa ka jingpihuiñ. Ki atnud haduh katta-katta haduh ba kim lah ban peit slem ïa ka jinglehbha jong kiwei. Lada long bha man bha kiwei, ki duh thiah duh dem. Lada kiwei ki don ïa ka lad ban kiew arted, kim sngewbang shuh wat tang ban bam ja ne dih sha. Lada kiwei ki kham nang ban kamai (da ka lynti kaba khuid), ki ïaleh ban woh daw woh dong da kumne bad kumtai. Don pat kiba leh arsap arphong da kaba buhrieh ïa ka jingpihuiñ. Hynrei kat nang buhrieh, katta ka jingpihuiñ ka nang kyan bad kam slem ban paw pyrthei.
Lehse ngi dei ban pynkylla noh ïa kata ka jinglong briew. Pynkylla sha ka jingbha. Dei ban ïakmen lang lada ki ‘lok ki leh bha man bha. Dei ban ïa thap kti jam ïa kiba lah ban kiew arted hadien ba ki la hiar arsut. Dei ban ïa ai mynsiem ïa kiba leh bha leh miat khnang ba kin nang poi kham sha kliar. Ki nongïalehkai ha ki jingïalehkai (sports) bapher bapher ki nang bha ban hikai ïa kiwei kumno ba kim dei ban pihuiñ. Ha kane ka juk kaba ngi lah ban peit ïa kino-kino ki jingïalehkai, ngi ju shem ba ki nongshah rem kim ju pyni ïa ka dur jong ka jingpihuiñ. Ki lah ban sngewsih namar ka jingbympoi sha ka thong, hynrei kim ju beiñ ju khoh ïa u ne ka nongjop. Ki kren bha, kren miat. Kane ka dei ka mynsiem bad ka jinglong kaba lehse ma ngi baroh ngi dei ban don lem. Ngi ju ïohi ba ha ki jingïakhun kiba jwat, ki nongïalehkai kim ju klet pat ban pyni ïa kata ka mynsiem ba lada jop ne rem, ka jingpihuiñ kam dei ban don. Ïa kane, ha ka ktien nongwei ki ong ba ka dei kata ka “Sportsmanship”. Ka don ruh ka jingong ba haba jop, dei ban long kiba sngewrit bad haba rem, dei ban long kiba don ïa ka mynsiem ban pdiang khlem khohñioh. Sa shisien pat, ïa kine kiei-kiei ngi lah ban ïohi pylleiñ-pylleiñ lada ngi peit bha ïa ki nongïalehkai kiba la paw bad tyngshaiñ kum ki khlur ha kane ka sla pyrthei.
Ha ka jingïaleh lane ka jingïakhun, la ka dei ha kano-kano ka bynta ruh, ka don beit ka jingjop bad ka don beit ka jingrem. Ngim lah ban lait na kine. Hynrei ka shong pat ha ki briew kumno ki shim ïa ka jingjop bad ka jingrem. Don kiba khyllew bad kiew skong noh hadien ka jingjop, bad kata ka jingsarong ka ïalam ïa ki sha ka jingjot thiaw. Ki ju ong ba ka jingsarong ka ïaid ha shwa ka jingjot. Ki don bun bah ki nuksa ha kaba ïadei bad kane. Don pat kiba atnud sah hadien ba shah rem haduh ba kim lah shuh ban jam shakhmat ha ka jingim bad ki shu jah noh kumto nakhmat ka pyrthei wat lada ki dei ki briew kiba don shisha ïa ka sap ka phong kaba la ai ha ki da U Nongthaw U Nongbuh. Ka jingjot ka ap lypa haba la kiew palat ka jingsarong lane haba la atnud bad pihuiñ shaba palat. Lada ngi peit bha ïa ki briew kiba heh spah (da ka lynti kaba dei) bad kiba la trei shitom shisha nalade, kim ju long kiba kob sarong. Ki trei minot beit thop ha la ka kam bad ki da pyni ba ka kam ka kren kham jam ban ïa ka ktien. Hynrei kito pat kiba shu kiew spah khlem da pynjaw ïa ka syep ka syar, ki sarong haduh katta-katta bad ki im kumba kata ka spah jong ki kan neh sah.
Don pat kiba ïalade ruh kim lah ne kim nang ban leh eiei, hynrei ynda la leh da kiwei kiba tip bad kiba nud, sa sdang sa ka pihuiñ. Kata ruh hana ka dei ka jinglong briew. Hynrei mano ba hiar arsut bad mano ba kiew arted haba kumne? Uta ne kata kaba pihuiñ ki hiar jraiñ, bad kiba kiew arted ki dei kita kiba nang ban trei ïa ka kam da ka jingkitkhlieh, ym da ka jingshitkhlieh. Kiba nang ban trei kim pyrwa ïa ka jingpihuiñ jong kiwei. Ki tur shaphrang da ka mynsiem bashynrang ban pyndep ïa la ka kamram. Ki kyntait sharud ïa ki jingsngew diaw ba uta ne kata ki kren bishni ne ki wad daw wad dong. Ki briew kiba minot thop kim salia ïa kaei kaba kiwei ki kren namar ka dei tang ka jingkren kaba ha suiñ bad kaba dap da ka jingpihuiñ. Kam dei kaba suk ban ym sngap ïa ka jingkren kiwei. Dei tang kiba la ih shisha ha ka jingmut jingpyrkhat kiba nud ban kyntait war ïa kaei kaba ki nongwad daw nongwad dong ki kren. Ka don ruh ka jingong ba ïa u dieng uba pynmih ïa ki soh babha bad bathiang, u kham shah kawang maw. Ïa u dieng uba ai da u sohjew soh kthang, ym don kiba kham leit tur shajan. Hynrei kat nang shah kawang maw, katta nang mih bun ki soh bathiang. Ïa uba jew bad uba kthang, bun u shu pyut kai halor dieng ne ha madan. To ngin ïa kylla thiah kylla dem ban pynkylla ïa kane ka jinglong briew basniew bad ngin ïa im lang hapdeng ka suk ka saiñ bad ka bha ka miat.
