Ka surok hi kumba la ju tip naduh ki por mynshwa ka dei u budlum jong ka ïoh ka kot bad ka roi ka par jong kano-kano ka jylla, ki district ne ki shnong ki thaw. Haba bha ki surok, ki nongleit-nongwan ruh ki ju sngewhun ka mynsiem ban leit shano-shano ruh wat la ka jaka ba ki thmu ka jngai ne jan. Ka jingsniew ki surok ym tang ba ka pynsyrtok ïa ka leit ka wan hynrei ka pynkylla dur ruh noh ïa ka jingitynnad ne jingkhuid jong ki jaka.
Kat nang ïaid bad mih uwei u snem sha uwei pat, ka jingmih jong ki surok ruh ka la nang bun. Kane da shisha ka la pynsuk shi kat dei ïa kiba bun ha ka leit ka wan, namar lada kim lait na kawei ka lad ki lah ban pyrshang pat na kawei. Ïa kane la sakhi ha man la ki shnong ne ki jaka na ka jingmih bun ki lad bad ki surok ban pynsuk bad khate ruh ïa ka por bad khamtam ban ïaleh ban pyllait na ka dheng kali, lait noh tang ki surok kiba bud sha ki jaka ïew.
Wat la ka jingmih jong ki surok la ka long ha ki shnong ki thaw ne kino-kino ki bynta ka la nang bun hynrei ka jingbym lah pat ban pynbit-pynbiang hadien jong ka jingsniew bad pei thliew ka wanrah pat ïa ka jingeh kaba khraw ha ka leit ka wan bad khamtam lei ka buh jingma ruh ïa ki nongleit-nongwan bad ruh ka jingsniew bad poi karkhana khah-khah jong ki kali ki motor. Kiba bun ki surok ha ki bynta bapher bapher ka nongbah Shillong bad khapsor ki la long thik kum ki surok ïaid kali kulai, namar ka jingsniew kam dei shuh kaba malu-mala, hynrei la dap sa tang da ki thliew haduh ba ka la shem jingeh ïa ki nongñiah kali ban kiar, lada lait ka shaka khmat, jlang hap ka shaka dien ha thliew.
Tang haba ïaid ruh la lah ban sakhi ïa ka jingsniew shaba palat liam jong ki surok, kiba la dap tang da ki thliew ki syar. Kane ka la pynthut shi kat dei eh ïa ki kali kiba ïaid ba ïeng bad khamtam lei ka jingma ïa ki nongleit-nongwan. La ïoh ruh ban sakhi ba ki la don bun ki jingjia jong ka jingkylla ki arshaka bad ka jingmynsaw ba malu mala jong ki nongñiah thuk-thuk, na ka jingbym lait shuh ban kiar na ki thliew ki syar.
La ju sakhi ruh ba ki nongtrei ka tnat PWD ha kiba bun ki khep haba ym pat ïoh ban maramot ïa kine ki surok, ki la shu pyndap tang da ki maw bad khyndew ban ïada na kano-kano ka jingeh ha ka leit ka wan jong ki kali. Don ruh ki shnong kiba mih shakhmat ban shimti ïa kane ka bynta ban pyndap da ka khyndew ha ki jaka ba la thliew shaba palat. Ka jingeh bad jingma hi ba kine ki thliew ki buh ka dei beit ha ka por jong ka jinghap slap, ha kaba ym ithuh shuh ïa ki thliew hynrei la i beit thik kum ki pung dohkha kiba don hapdeng surok.
Lah ruh ban sakhi ha kine ki sngi kiba mynta, ba kawei pat ka daw jong ka jingsniew ka surok ka dei na ka jingthep pipe um jong ka tnat PHE ne kita ki pipe na ka skhim JJM, ha kaba hadien ba la tih pynsniew bad thep ïa ki pipe, ym ïohi pat ba ka jingtap khyndew kan long ha ka rukom kaba biang ne paka, hynrei la shu tap katba lap ba shem tang ban pyni ba la tap. Balei ym lah ban leh bha ne tep bha ïa ka khyndew, haba phi pynsniew phi dei ruh ban nang ban pynbha, ym dei ban shu ïa leh mon.
Ka jingkylli kaba mih lyngba ka jingsakhi ïa ka jingsniew jong ki surok ha kiba bun ki bynta khamtam ha nongbah Shillong, ka long ba aïu ka Sorkar ka la leh, namar ym ïohi satia ba kan maramot wat haba ki thliew ki syar ki la don da ki bnai hapdeng ki surok. Hato yn ong ba ka dei ka jingbym shimkhia ki nongmihkhmat ne ka jingleh bym patiaw jong ka Sorkar ne ban shu ai daw ïa u slap, kaba ym lah ban pdiang satia.
Ka por ka la dawa ba ka Sorkar lyngba ka tnat ba dei khmih, ka la dei ban phai khmat noh sha kane ka bynta bad ban sdang noh ka jingmaramot khamtam lei ha kito ki bynta kiba bun ki thliew ki syar na ka bynta ban pynsuk ïa ka leit ka wan, ban weng ïa ki jingma kiba lah ban mih bad kumjuh ruh ban long ka kti jong ka jingïarap ïa ki nongñiah bad ki trai kali, kiba la mad ïa ka jingduhnong na ka jingsniew ba man la ka por jong ki kali.
