Imphal, Risaw:
Ka kynhun World Meetei Council (WMC) ka la thoh shithi sha u Myntri Rangbahduh u Narendra Modi ha kaba ka la buh jingkyrpad ba u la dei ban shim khia halor ka jingdonkam ba la dei ban pyntreikam kyrkieh katba lah bad ban ai jubab halor ka sorkar ha Manipur, katba ha baroh ka jingdawa ba la dei ban pynmih bujli noh ha ka jaka ïa u Myntri Rangbah uba mynta.
Ka dorkhas ïa kaba la soi da u Chairman jong ka WMC u Heigrujam Nabashyam bad phah sha u Myntri Rangbahduh ha ka sngi U Blei, ha kaba la ïaiban shuh shuh da kaba ong ba ka Manipur ka dawa ïa ka jingshimkhia jong ka sorkar.
Ka la pynrem halor ka jingbym lah ban leh ei ei jong u Myntri Rangbah bad jingbym lah jong u ban wanrah biang ïa ka jingsuk ha ka jylla wat hadien ki 17 bnai ba la jia ka jingïakynad.
Hashwa kane, u Myntri Rangbah jong ka Manipur, u N Biren Singh, u la kyntait pyrshah halor ki jingbna khubor ba u la thmu ban hiar shuki, ha kaba u la ong ba kine baroh ki dei tang ki khubor lamler bad ki bym don nongrim.
Ha ka jingïakren jong u bad ki lad pathai khubor ha ka TV Channel ha ki khyndiat sngi ba la leit, u Singh u la ong ba kam shym la don jingkylli ei ei ha kaba ïadei bad ka jinghiar shuki khamtam kum ha kane ka por ba ka jylla ka la shah ktah na ki jingïakynad.
U la ïai ban shuh shuh da kaba ong ba ki jingthmu jong u ki long ban ïaleh ha ka ban pynphai biang ïa ka jingsuk bad ka jingïaid beit ïaid ryntih ha ka jinglong jingman hapoh kane ka jylla kaba la shah ktah jur.
U Myntri Rangbah, uba la ïakren sani bha bad ka kynhun nongïalam jong ka sorkar kmie, kaba kynthup ïa u Myntri Rangbahduh u Narendra Modi bad u Myntri ka tnat ki kam pohïing u Amit Shah, u la ai jubab halor ka khubor kaba la kam ba u la tyrwa ban hiar shuki.
Kumba ka la jia, la ong ba ki la don kumba 19 ngut ki MLA jong ka seng BJP na ka sorkar kaba bat ïa ka jingsynshar ba la lamkhmat da ka seng BJP ha Manipur kiba la phah da ka shithi sha u Myntri Rangbahduh, ha kaba ki la dawa ba la dei ban weng noh ïa u Singh kum u Myntri Rangbahduh ka jylla.
Kane ka TV Channel kaba la pynmih ïa ka kaiphot kaba ha shwa ka la ai jingmut ba ïa kine ki kam la leh hadien ka jingïakren bad u Myntri Rangbahduh.
La ïathuh ruh ba u Myntri Rangbahduh u la sngewkhia ha kaba ïadei bad ka jingphah hiar shuki ïa u Myntri Rangbah, hynrei u Singh u la thmu ban hiar shuki na ka jingpynbor palat jong ki para dkhot hapoh ka seng.
Ka kaiphot ka la pynshisha shuh shuh ba ha ka 15 tarik, Risaw, hadien ka jingïakynduh bad u Lamphang ka jylla Manipur, u Th Satyabrata, ki 19 ngut ki MLA kiba pyrshah, ki la kyrpad jur ïa u Myntri Rangbahduh ba un weng noh ïa u Singh na ka shuki jong u.
Ki la phah ïa ka dorkhas halor ka jingdawa ban weng noh ïa u Myntri Rangbah, kaba la pynmih ïa ka jingkynthoh kaba jur shaphang ka jinghiar shuki jong u khamtam hadien ka jingïakren bad u Myntri Rangbahduh.
Hynrei, u Singh u la kyntait pyrshah halor kane ka jingpynshisha,da kaba pyntikna ba un dang bteng ïa ka kam jong u kum u Myntri Rangbah ka jylla.
