Imphal, Risaw:
U Magistrate jong ka Tamenglong District jong ka Manipur, u Dr L. Angshim Dangshawa, u la khang ban pyndonkam ïa ki bom pataka bad ki bom ding ha baroh kawei ka District, ha ka por Diwali, halor ka jinglong jingman jong ka suk ka saiñ ha ka Jylla. Kane ka long hadien ba u Superintendent of Police (SP) ka Tamenglong u la tyrwa ban khang ïa ka jingdie bad jingpyndonkam ïa ki bom ding ha kane ka tamasa ba la jan.
Ha ka hukum ba la bthah sha ki paidbah ha ka jingïalang, u nongbishar jong ka District jong ka Tamenglong u la kdew ba ïa kiba bun ki thaiñ jong ka Manipur la buh kum ki “jaka ba la pynthut,” ha kaba ka don ka jingma ba ki bom bad ki jingpynbthei ding kin lah ban pyndonkam bakla ban pynmih ïa ka jingtieng bad jingkulmar hapdeng ki paidbah ne ban pynkylla lynti ïa ki bor pahara bad ban thaw ki lad ki lynti na ka bynta ban khanglad ïa ki jingma bad pynmynsaw ïa ki briew.
“Katba, la kdew ba bun ki bynta jong ka jylla Manipur la pynbna kum ki jaka ba la pynthut. Kumta, haba peit ïa ka jingleh donbor da ki tiar ïaleh kaba la don ha ka jylla, ka don ka jingma ban pyndonkam bakla ïa ki bom bad/lane ki jingpynbthei ding da ki riew donbor bapher bapher . Da ka jingthmu ban pynmih jingsngewsih ne jingtieng ne jingkulmar hapdeng ki paidbah, ne wat ban pynher krad ïa ka kynhun pahara, ki bor kum ka jingmih na kum kane ka jingleh bymman ne jingpynkulmar da ka jingthmu ban pynmynsaw ne pynduh ïa ki mynsiem bad ki mar ki mata shawei pat,” la ong ka hukum.
Da kaba pynkynmaw biang ba ka jingpyndonkam bakla ïa ki bom pataka ka kham lah ban wanrah ïa ka “jingpynkheiñ kaba jur ïa ka jingsuk, ka jingpynthut ïa ka jingsuk jong ki paidbah, bad ka jingma ïa ka jingim bad ki mar ki mata jong ki briew,” u Magistrate u la pynpaw ba ka jingkhang ïa ki kan ïarap ban ïada na ki jingjia bashyrkhei.
Ka hukum ka la ong ba ïa ka jingbishar ha katei ka kam yn shim katkum ka kyndon 163 jong ka BNSS (The Bharatiya Nagarik Suraksha Sanhita, 2023), da kaba kdew ïa ka jinglong jingman kaba kyrkieh lada donkam. “…namar ba ka jingrakhe ïa ka tamasa Diwali la khmih lynti ba kan sdang naduh ka 31 tarik, Risaw, kata mynta ka sngi, ym lah ban ithuh ïa baroh ki briew kiba lah ban wanrah ïa kum kine ki kam sniew ne pyndonkam bakla ïa ki bom pataka / lane ki jingpynbthei ding hapoh ka por kaba lyngkot kaba don bad kumta ka don ka jingeh, bad nga shim ba kane ka long ka bynta kaba biang ban shim; ki jingbishar katkum ka kyndon 163 jong ka BNSS (The Bharatiya Nagarik Suraksha Sanhita, 2023),” la ong ka hukum.
U Magistrate jong ka distrik u la bthah ba “ym don briew, briew ne kynhun, da kano kano ka kyrteng kaba la tip, ban don bad die ïa ki tiar pynbthei bad ki tiar pynbthei ding khlem ka License kaba biang katkum ka kyndon 84 jong ka Explosives Rules, 2008.” Shuh shuh, la pyntip sha u SP ka Tamenglong ba ym shym la ai Lisence ba shipor ban bat bad die ïa ki bom pataka bad ki jingpynbthei ding ha kaba ïadei bad ka tamasa kaba la jan poi.”Kano kano ka jingjia jong ka jingdon bad die ïa kum kine ki tiar ki long kiba pynkheiñ ïa ka aiñ Explosives Act, 1884. Ka jingleh katkum ka aiñ yn shim pyrshah ïa kum kine ki nongpynkheiñ aiñ,” la kdew ka hukum.
