Allan Lyndem
Kat kum ki khubor (print/visual media) kiba la mih ha kine ki khyndiat sngi khyndiat hat, la ïohsngew ba ka District Council ka la ïoh ‘assent’ na u Governor ban pynjari ïa ka Aiñ “Tang-jait” bad ban lum-lang (compile) ïa ki kyrteng jong ki Kur baroh hapoh ka Bri U Hynñiewtrep (kumba i Bah Spiton Kharakor i lah ju leh kumta ha kito ki snem kiba la leit). Shisha, kane ka jingthmu ban lum (compile) ïa ki kyrteng jong ki Kur ka dei kaba da sngewbiang eh namar yn ïoh ban “register’ bad ïa tip bha ruh ïa ki kyrteng jong baroh ki Kur ha ka Bri U Hynñiewtrep. Hynrei na kaei kaba ïohi/ïohsngew na ki khubor, la shu sngewthuh ngut-ngut nget-nget ha kaba la batai ba u Rangbah Kur (uba lehse ha la ki Kur ki Kur ki ‘designate’ kum u President-Kur lane Chairman-Kur, etc) un dei u nong pynïaid lane un long ka Bor ban pynïaid pynbeit, pynbiang, pynkyntang ïa kata “Tang-jait Tang-khong” bad nangta ynda la dep kata un sa hap ban pyntip sha ka Bor District Council.
ïa ka Jaidbynriew jong ngi la pynlong da ka jingdon jong ki Kur bad ïa ki Kur la pynlong da ka jingdon jong ki Kpoh-kur. Ha man la ka Kpoh-kur, don u/ki kñi. Te ha ka symboh pyrkhat bad thymmei rukom jong ka Jaidbynriew jong ngi, u/ki kñi u dei uba ïalam ha ka leh-niam leh-rukom, ïalam-ïabud ha kaba ïadei bad ka Kpoh-kur, kum ha ka ïateh-ktien, ka shong-kha shong-man, tang-jait tang-khong, pynbeit jaka puta bad kiwei kiwei. Kum ban shu ai nuksa noh da ka kur Nongkynrih (lane kano kano ka kur kaba phi ïa sngewbit sngewbiang ma phi ki nongpule ban ai nuksa kumta ) – ka Kur Nongkynrih ha ka Bri U Hynñiewtrep ka dei ka kur kaba ki Kpoh-kur (unit) ki don kiba na Sohra, na Laitmawsiang, na Nongkynrih, na Lakadong, na Sohryngkham, na Raliang, na Nongpoh bad ha kiwei kiwei ki jaka hapoh ka Bri u Hynñiewtrep. Ha la ki kpoh ki kpoh ki don la u/ki kñi kiba ïa pynpeit, pynsynran, pyndep ki ruom ki dustur kiba ïa dei bad ka Kpoh-kur.
Mynta kum ban shu ai shuh shuh sa kawei pat ka nuksa : ka rta jong u Rangbah kur – uba lehse yn khot ïa u, u President/Chairman jong ka Kur (kata jong kawei ka kur baroh kyllum) ka kham duna lane u kham khynnah ban ïa u kñi jong kawei ka Kpoh-kur. Te ha ka symboh pyrkhat jong ka Jaidbynriew, u kñi u dei uba la don la ka rta bad ka kyrdan kñi uba ïalam ha ki kam ki jam ha ka leh niam leh rukom (kum kitei kiba la kdew haneng) ha kaba ïa dei bad ka Kpoh-kur, te ka jingkylli ka mih ka long – la ka sngewbiang ba u Rangbah Kur uba ka rta kaba kham khynnah ban ïa u kñi jong kawei ka Kpoh-kur un dwai un phirat, un pashat ki nia ki jutang, un sneng un kraw halor ka kam tang-jait ha khmat u kñi jong kawei ka Kpoh-kur? Haba iohsngew na ki khubor halor katei ka aiñ, shu hap ïa puson noh – La u Rangbah Kur (President Kur jong ka Kur baroh kyllum kawei) uba shong ha Sohra lane Shillong u kham sngewthuh bad shemphang kham bha ban ïa u/ki kñi jong kata ka kur kiba shong ha Raliang lane ha Umroi lane ha Mawkyrwat ?. Lehse ngin sa kham ïoh jingshai shuh shuh halor katei ka Aiñ.
Nangta kumba long mynta, ha ki Lympung ne ki Seng-Kur kiba la saiñ dur da ka juk thoh bad modern democracy. U Rangbah Kur u lah ban dei u bym pat don ha ka kyrdan Kñi bad U Kñi pat u lah ban ym shah jied kum u “Rangbah Kur” (President-Kur ne Chairman-Kur) . Te yn da poi ki khep kiba u Kñi u dei ban pyndep ïa ka niam ka rukom ka ïa-lam ka ïa-pur kat kumba ka dei ka dustur jong ka Kur, te hangta mano ba don iktiar u Kñi ne u Rangbah Kur ? Ha ka por ka leh niam-Kur, leh kam-Kur mano ba don hok ban pyndep – u Kñi ne Rangbah Kur / President Kur ?”
Lada ïa phai sha kiwei pat ki bynta ruh, hateng hateng ki don ki jingkylli kiba ju mih ba – La ka long kaba shisha ba baroh ki bynta trei-kam jong ki Shnong, ki Raid, ki Shnat, ki Elaka, ki Hima ki la hap lut hapoh ka District Council ne ki don ki bynta kiba lait de ? Don kiba ong ba baroh ki bynta trei kam ki la hap lut hapoh ka District Council. Nangta don pat kiba ong ba don ki bynta trei kam kiba ym hap hapoh ka District Council, bad kiba hap te ki dei tang kito ki bynta trei kam ïa kiba la pynkup bor ha ka Sixth Schedule jong ka Constitution of India. Shu buh, kum ka kam kaba ïadei bad ka ‘Pomblang Nongkrem’, ka long kaba artatien shibun ba ka District Council ka don ka bor ban ïa tuklar ne ïa batai kiba kumno ki jaid blang ba dei ban kñia lane kiba kumno ki jaid sla ba dei ban pyndonkam.
Ki bor kiba donbor ki hap ban da peit bniah ïa ka liem ka lup, ïa ka kem ka lar bad ngim lah ban klet ba hapdeng ka Jaidbynriew jong ngi don bun spah bun hajar ki “Exogamous Group”. Hapdeng jong kawei ka “Exogamous Group” ki lah ban ïa khot ïa sin ïa lade da ki kyrteng ba pher ba pher, tangba para ma ki te ki ïa tip hi ba ki dei na kajuh ka “Exogamous Group” bad ba ki ïadei shikur. Shu buh, kum ki Shallam, Shabong, Mukhim bad Khyriem (lane kumjuh ruh ki Laloo, Lamin, Diengdoh, Hek, Laithma, Pyrbot,) ki ïa tip ba ki ïadei na kajuh ka “Exogamous Group”. Ki khun ki ksiew pateng pakit na ka liang ka Ïawbei Dkhar bad na u Thawlang Khasi ruh ki hap hapoh kawei ka “Exogamous Group”. Bad kiba bun bah kum kitei ki “Exogamous Group” ki da buh bynrap ïa i kyntien “Khar” na khmat. Kum ban ai nuksa, ki khun ki ksiew pateng pakit na ka Ïawbei Dkhar, ba la ju tip kum ka Mohkynhong bad na u Thawlang Khasi uba kyrteng u Step Lyndem ki hap hapoh kawei ka “Exogamous Group” bad la ju tip ïa ki kum ki “Kharkongor”.
