D H Kharkongor
Nga ngeit kane ka dei hamarpdeng jong ka Synrai. Nangne sha khmat ngin sanang sngewthuh shai sa ïa ka jingkhreh sdang jong ka Tlang. Ka jingshai jong ka sngi kan nang ïailyngkot katta kaba ka jingdum jong ka mied kan nang ïaijlan. Katei ka sngi ha sahitbneng pat de ruh kan sanang tlot bor. Ka ‘er Tlang kan sa shim bujli noh ïa ka jaka jong kane ka ‘er Synrai kaba dang iohlad kumne ban behjem jai hir hir khamtam ha ka por janmied, hamar shwa ban sep noh ka sngi. Kumta ngin sanang mad ïa ka jingkhriat ha ka jaka jong ka jingpynngad. Ka jinghap lane ka jingjaw jong ka umjer ruh kansa nangjur. Ka Synrai lem bad ka Tang ki dei ki aiom kiba nga sngewtynnad tam duh.
Ha kaba ïadei bad ki ‘sngi’ jong ka ‘Taiew’ nga shem ba ka ‘Sngi U Trai’ lane ka ‘Sunday’ ka dei ka sngi kaba nga sngewtynnad tam duh. Ka dei ka ‘sngi’ kaba nga iohlad ban ‘puson’ sani bha ïa ka ‘jingshisha’ lane ïa ka ‘jingmut’ lem bad ïa ka ‘jing-thmu’ (purpose) jong kane ka jingim, ka jong ngi kum u khunbynriew, hangne ha sla pyrthei. Naduh dang step ir nga lah lah ban sngewthuh shai ïa ka jinglong kyrpang ka jong ka.
Lah ban sngewthuh shai wei haba kiba bun ki khie thiah khamsngi lane khamslem. Kiba bun, wat ynda ki la khie thiah pynban kim kyrkieh lane kim laplah, kumba ki ju long ha kiwei pat de ki sngi jong ka taïew, kata, la ïa kaei kaei ruh. Kumta ki katto katne ki kynta ki jong ka step ‘Sunday’ ki long kiba jar jar bha. Ki dei ruh ki kynta jong ka jingjai-jai. Ka da paw shai pat de ruh ba ka ‘Sunday’ ka dei ka sngi kaba kiba bun ki ïaleh katlah katïai ban im ïa ka jingim kaba ‘tip briew tip Blei’. Ka sngi kaba ki ïaleh ban adkar tad naduh ka ktien ka thylliej tad haduh ki kam lane ki jingleh. Ka paw shisha kumta wei haba nga shong nga sah ha ka shnong kaba ym ïakhleh jaitbynriew, kaba kiba bun pat de ruh ki dei ki ‘Khristan’. Ka sngi kaba nga imat kumba wat u ‘Soitan’ ruh u shongjahthait. Ahh! jin lada man la ka sngi ka dei ka ‘Sunday’.
Hynrei wat nym sngewthuh bakla. Ngam don eiei kaba pyrshah la ïa ka jingngeit Khristan (Christianity) lane ïa ki Khristan. Nga sngew dei ruh ban pynkynmaw biang hangne ba ngam pynksan lymne pynrem la ïa kano kano ruh ka kynhun Balang Khristan (Denomination). Ha nga hi shimet ka ‘Christianity’ kam dei ka ‘niam’ (religion) hynrei ka dei ka jingïadei (relationship) kaba ‘maian’ bad kaba shimet shimet hapdeng u briew bad U Blei. Kumta kam dei ruh ka ‘rukom’ leh-niamleh-rukom (rites and rituals). Ha nga hi shimet ka dei ruh ka jingdon ïa ka ‘jingïasyllok kaba – maian’ (fellowship), kaba shimet beitthik, hapdeng u briew bad U Blei. Ka dei halor kata ka rukom sngewthuh ba ngam ju kwah ban ïataiñia halor ka ‘Baptism’ lem bad ka ‘Sacrament’ lane halor ka ‘Church Doctrine’. Ngam kwah sngap ïa ka ‘jingïatai’ halor ka jongno kaba dei (right) bad ka jongno kabalait (wrong). Ka daw ka dong ba nga shu jubab mynthi beit noh ba nga te nga don ha ka ‘kynhun Balang’ (Denomination) ka jong uto u ‘dakaid’ uba halor jong ka ‘Diengphna’. U ‘dakaid’ uba la mad halade hi shimet ïa ka ‘jingieid’, ïa ka ‘jingi-snei’ bad ïa ka ‘jingaiei’ ka jong u Jisu Khrist. Ngam ju pynkthah khlieh shuh hi ruh ïalade ban wad bniah lane ban tohkitbniah, khnang ban tip thikna, uei uta u ‘Anti-Christ’.
Ym lah pat ruh khlem da poi ban ‘puson’ halor ka met-iap ka jong uto u ‘dakaid’. Ka met-iap kaba sdiengldoi halor ka ‘diengphna’ kaba dei ka dak jong ka ‘jingpynrem’ (condemnation) bad ka jingjah burom (shame). Kaba katno tam ïa kaba ngi ong ka ‘jingpyndep kaba khadduh, ïa ka met kaba dang sah. Kaba nga ju iohsngew ruh ba ki ong ka ‘lehniam bad ka lehburom kaba khatduh khatwai’. Kumta ngam lah khlem da kum kylli mano keiñ ban dang kynmaw ban ‘suitñiew’ ia ka met iap ka jong uto u ‘dakaid’ lane uto u ‘nonglehbymman’, uba ka imlang sahlang ka dang shu dep ban ai ïa kaba kat kata ka jingpynsajia lane ka jingpynshitom ? Nga artatien jur ban don kiba treh ban kam lane ban shimti ïa ka met-iap ka jong uba kum uta u briew. Nga aratien ba un ioh ïa kata ka ‘jinglehniam kaba khadduh khatwai’.
Kumta ngam artatien lada ka met-iap ka jong u ka ïaisdieng sah hangto halor jong ka ‘diengphna’ tad haduh ba kan da pyut hi plak bad bthei ruh phum. Tad haduh yndahap hi noh baroh ka doh (flesh) kaba sop ïa ki shyieng ki shruh. Tad ynda ki shyieng ki shruh, kiba la tyrkhong hi raw, ki hap hi noh, kawei hadien kawei, sha kjat jong ka ‘diengphna’. Tangba kampher wei ba ka ‘met-ïap’ ka dei tang ka ‘shynrong’, kaba dei ban leit phai biang sha ka ‘dewmet’. Kan pher lei wei haba lah ‘thikna’ ba ka ‘mynsiem’ (soul) (ka jong kata ka met-ïap) ka lah don bad ka lah ‘shongneh junom’ bad la u jong u ‘Kynrad’ ha ‘Paradise’.
