Bah A.Z. Sohtun, Kyrdemkhla (Laitkroh Sirdarship).
Hooid ngim lah ban len ba kat kum ka jingïoh lum jingtip ba dang shen ha ka khanasamari jong u snem 2024 ba ka Literacy Report rate jong kiba lah nang lah stad ha Meghalaya ki lah kot sha ka 74.43 percent. Ki shynrang kiba lah nang lah stad ki long 75.95 percent katba ki kynthei pat ki long 72.89 percent. Ka sorkar Meghalaya ka lah ai mynsiem bha shisha ïa ki khynnah pule ba kin kham minot ban nang ïai kyntiew shaphrang ban pynïoh ki mark kiba heh ha baroh ki subject khnang ba ka Sorkar kan ïoh ban plie lad plie lynti ïa kito kiba la pass bha khnang ba kin long kum ki khlur ka ri bad ka jingsarong jong ka lawei ka jaitbynriew jong ngi haba nujor (Comparing) bad kiwei kiwei pat ki jaitbynriew ha ri India. Haba ngi la ïai peit pyrman bha mynta da ki phew snem, kum ki kpa ki kmie ki lah pynlut spah na bynta ïa ki khun tang ban pynnang pynstad ym salia shuh wat ban bah da ki ram ki shah ruh. Ynda ki khun samla jong ngi ki la ïai minot shitom bha ha ki eksamin naduh kum ka SSLC, HSSLC bad ki jingpule jong ki laiñ bapher bapher bad ha ki Digree bapher bapher, da shisha man la u snem ki la poi sha ka thong kum ki Top Ten, First Class First kumta ter ter ha la ki jong ki jong ki laiñ jingpule. Ha kaba khatduh ka Sorkar ka pynkmen ïa ki da kaba ai khusnam pynkhyllew tang da ki freebie Laptop tad (Ordinary) haba treikam tang jing-jang ka lah da khluit bad duh bad ing noh syndon. Lada apply kam pat kat kum ha ki Advertisement bapher bapher kum ha MPSC, DSC, SSC, ki kynja Board, Corporation sorkar kumta ter ter kata kat kum ki qualification. Ka Sorkar kam ju condone ne pynjynsur kum kata ka exemption cases ïa ki seat/post ha ki interview na bynta kitei kiba la pass bha haneng da kaba ai daw ba kim pat don jingshemphang ha ka kam kumba 3, 4 snem ter ter ha kum kitei ki kam ba ki apply, lada ki khynnah ki long ki bym pat don jingshemphang te balei kam thung (Appoint) shuwa ïa ki kum ha ki probationary period /internship period/training period kumta ter ter ynda la pyndep ïa kata ka por ba la buh te kin sa long kiba lah tbit bha ha kata ka kam kaba ki apply te sa Confirm / Recognize / regularise pat ïa ki kam jong ki. Namar kane ka nuksa bad ka daw bah bun ki kpa ki kmie jong ki khynnah ki la pynpep / pep skul noh da kaba phah bylla noh ïa ki khun ban ïoh pisa. Kane ka koli juk ba mynta ka la urlong shisha kumba la thoh da uwei na ki Myllung Khasi uba la paw nam tam ha ri Khasi jong ngi u Babu SoSo Tham, kata ka long kumne “Baroh u briew ba stad mano ba lah ban len, la khlem da plie ki lad kumno un lait ban kren.” Bad bun na kitei kiba lah pass bha ruh ki lah shu kut noh tang kumto khlem kam khlem jam poi sha ka im lali shang dih kiad bhor bhor bad ngat ha bun ki jingpynshoi ba sniew bad ba la pait dohnud bad kiba la shu shang makia khlem jingkyrmen na bynta ka lawei jong ki, namar kat kum ki Syrnot Snem jong ki ruh ka lah dier ïa ka rta wad kam wad jam. Kumta nga kyrpad ïa phi ko ka Sorkar ba don burom sngewbha wat ju nguid ïa ka prie ba ïoh kem pang pat hadien, ko ki Seng Bhalang ba don burom kiba na ka doh ka snam jong ngi to wat sngap mynthi to khie joit peit-mat noh leh eiei na bynta ka ri bad ka jaitbynriew na ba ki dei ki para doh para snam, ki para, pyrsa jong phi hi, wat thiah sah wat ieid tang ïa ki kymbor syaid namar ïoh kloi ba sep ka sngi na bynta ka burom bad ka nam jong ka lawei ba phyrnai jong kitei ki khun samla ba la kdew haneng. Khublei shibun
