U Nongsaiñ Hima, 1983
Ym dei tang ka Spah jong ngi u Khasi hynrei ka Khaïi ka Pateng ka Kam ka Jam, ka jingroi ka it ka hima imat ka neh tang shi khmat shi khmat. Lada ka Jaidbynriew kan roi kan pa bad ba kan ïaid shaphrang, ka Spah, ka khaïi Pateng, ka Kam ka Jam, ka jingroi ka it ka hima kim dei ban long tang shi khmat, hynrei ki dei ban san pateng la pateng khnang ba ka jaidbynriew kan ïaid shaphrang.
Peit thuh ïa u dieng, haba ngi thung ïa u, u rit tang shi dana, hynrei da ka jingsumar, da ka jingaium u san bad u nangsan pateng la pateng. ïa ka jingbymroi ka Spah, ka Khaïi ka pateng jong ngi u Khasi la dei ban wad ïa ka daw tynrai, Balei ba ka long kumne ?
Hapdeng kiwei pat ki jaidbynriew haba ngi peit thuh kai tang ha kane ka Ri jong ngi, ka spah jong ki ter-ter ka roi bad ka san ter shi ter. La ju iohsngew ïa ki jingïathuh khana ba don uwei uba sdang ïa la ka jingim ha kane ka Ri jong ngi tang da ki shiphew pisa. Ha ka jingim jong u, u la lah ban pynroi katto-katne. Ha ki khun jong u ka la nangroi ban shah. Mynta pat ha ki ksiew jong u ka kamai kajih jong ki ka la roi da ki hajar shah. Balei ka long kumne .
Ka jubab ïa kane ka jingkylli ka long kaba shai. Hapdeng jong ki don ka jinghiar pateng kaba thikna bad ruh kane ka jinghiar pateng ka leit sha kita kiba lah ban shimti bad pynïaid ïa kum kita ki jaid jingtrei. U khun rangbah u shimti na u kpa bad u kpa ruh u hikai bad u pynbud ha kti ha kjat ïa la u khun ba un nang ba un sngewthuh ïa kum kata ka jaid kam ba u trei namar haba u pang ne u khlait noh ka khmat, u khun un lah ban shimti bad pynïaid ïa ka kam ba kan ym sangeh ne thut ne duh noh tang shu iap u trai.
Ha ngi pat kam long kumta ? Ka jinghiar pateng la ka thikna hynrei ka jingshimti bad jingpynïaid ïa ka kam, ka leit sha kita kiba ym lah ban shimti hi dalade ïa ka kam. Kane ka pynsyier shibun ïa ki trai kam ne kum ïa u kpa ba un theh ïa ka spah ka hajar ban seng namar tang shu khlait ka khmat jong um, um tip shano kata kan leit bad kumta um dem ka mon ban nang pynheh shuh ïa la ka kam.
Lah ban ong ba dei na kane ka daw ba ka spah Khasi ka neh tang shi khmat bad kam roi kam san kumba ka dei ban san kmba ka long lem sha kiwei ki jaidbynriew.
