Naduh ba la dkut u Sohpetbneng bad ïa khyllem ka Diengiei ka dustur ka riti ruh ka la thynrei ym don shuh ka jingbud beit bad ryntih kumba la buh u longshuwa manshuwa. U Kni uba long u mawdong ka kur ka jait ha iing ha sem ha ka sotti juk kaba long ka juk kaba dap da ka suk ka saiñ ka bym ju donkam ban da thoh da tar. Hynrei ïa shu ïa hun bad bud beit tang ïa ka jingïakren da ka ktien ka la biang.Katba mynta ba la dei kata ka kuli juk kano kano ka mat ka donkam beit da ka jing-thoh jingtar ban buh pynsah jingkynmaw (Record) ïa kaei kaei ba ngi la kam nongkynti.Khlem ka jingthoh jingtar mynta ym don shuh ki ban shañiah ïanoïano ruh. Ka jingthoh ka long ka sakhi kaba shai bad kaba skhem mynta ki por. Ka riti ka dustur ka long kum ka lynti kaba la pruid dak da u longshuwa manshuwa ban pynïaid beit bad ryntih ïa ka synshar ka khadar. Ka juk ka bym don ka bishni ka pihuiñ para briew.Ka kuli juk pat ka la thom bad kdiah noh ïa ka sotti juk kaba ka jingsuk ka synshar ha ka imlang ka sahlang. Ha ka kuli juk ka la don sa tang ka jingïapher bad ia kynat para briew. Ym don shuh ka jingsngewlem para briew. La mih tang ka jingïaleh pyrshah hapdeng kawei ka kynhun pyrshah ïa kawei pat.Ka la mih ka jingïasngew pher jait pher kynja bad ka jingïasngew pher niam ha kane ka kuli juk. Sotti juk ka long ka juk ka jingsuk kaba shisha bad kuli juk ka long ka juk jong ka thma.Kane ka long ka jingsngewthuh jongnga kaba ïadei bad ka sotti juk bad ka kuli juk.
C.B. Iawphniaw
