U Nongsaiñ Hima,1981
Phi shet ka ja, phi thaw ka ïing, khlem ka dieng lehse phim lah ban leh bad kumta ngan ïathuh ïa phi ba nga dei u dieng uba la san bha mynta ha ki khlaw jong ka ranab u Lum Shillong. Katno nga sngew sarong ban ong, ba ma nga bad kiwei kiwei ki dieng ngi la lah ban pynlong ïa ki khlaw kiba jngum ha katba ki sim ki doh ki la pynlong ki jaka rieh bad ba ngi pynitynnad ïa ka lum ka wah ha kaba u khun bynriew na kylleng, u wan rieh tngen bad ioh ïa ka ‘er pyngngad bad ‘er batemon.
Ha kawei ka sngi, katba ka Mei – Ngi ka dang phrung ïa la ki shympriah ha ki tnat bad ki sla, katba ki sim ki dang siaw bad rwai, nga iohsngew ïa ka jingsawa kaba shyrkhei kaba triem ban ïa ka jingtied u pyrthat. Kynsan kynsan nga suh jler ban iohi ba kitei ki briew la ka kurat bad ki sdie ki pynkhyllem ïa ki apra dieng khlem kheiñ rangbah khlem kheiñ khynnah. Ani ! dang heh u khaw, tip kumno nga shu lait na kane ka apot kaba kiwei kiwei ki para ki la ngat.
Nga kynmaw ba ha kawei pat ka por, ha ka sngi kaba shi kyrang bad katba ki khlieng sha suiñ ki dang swait tang ban pynlut por, la tdem kynsan ka jaka ka puta haduh ba ym lait pynhiar mynsiem shuh bad kham katto nga iohi ba ki thylliej ding ki jliah khlem map kum uto u ‘len pula bad kham shipor shu dum bad ïon glut khait ka bneng ka khyndew. Tmang nga sah ma-rwei, hadien ba lait na kane ka lanot kaba arsien bad haba la hap u slap ngam lah khlem da jaw ummat lem ban duh ïa la ki lok ki jor, ki bymman ki para bad kiba haïing.
Kumta naduh kata ka por nga shu im dukhi dukhait bad ïambriew teng teng na ka bynta kane ka jingduh kaba khraw. Kap kap la wan ka tyngap ha kawei ka step bad nga la bat shongkai ban lorni ïa ka kam u khun bynriew. O phim tip seh, la lum dorbar u shnong u thaw, la rkhiang ka pyrthei ka mariang, la rngat lut ka um ka wah. Ka daw,’ la ong ka tyngap, ba la lut ki khlaw ki btap, ki dieng ki siej kiba ju teh lakam la ka um ba kan ym shang makia shane shatai.
Khlem ki dieng kiba phikir ïa kane, ka um ka la long laitlan bad rong ïa ka khyndew ka sboh. ‘Ki stad jong u khun bynriew, la ong ka tyngap, ‘ki don ha ka jingsyier kaba khraw, ba ym dei tang ba ym ioh um shuh, hynrei u nongrep sa khyndiat snem, un hap puh sa ïa u maw ym ïa ka khyndew.”
Kap kap kap, ka tyngap ka la ong ba ka la kyrkieh bad ka phet jyndat bad ong artad ba tharai katta nga la sngewthuh. Hangta nga puson bad duriap marwei marwei, katba ki lyoh ki dang kah tngem ïa nga bad nga la shu ong ha lade, “pleng ka kput ïa ka kput ki blei ki la thut ïa ka jingpynjot ba khlemakor jong u khunbynriew bad mynta hi la ai ka saja ïa ki kam runar ba u la leh. Hato ki briew ki ïa thngad ma, hato ki la rai ma ban burom ïa ka aiñ jong ngi ki dieng, ba haba ki shim noh ïa kiba dei ban shim ki dei pat ban beit symbai da ka jaid ka kynja jong ngi ba kan nang roi nang pa ?’
Kane ka long namarkata ka jingkylli jong nga, bad ka jubab ka long ha ki khun bynriew bastad.Nga kyrmen namarkata ba katba nga dang im, ngan iohi ïa ka sngi ba kin sei ki para ki pyrsa jong nga, ym tang ha kane ka thaiñ jong u Lum Shillong, hynrei ha kylleng jong ka ri baïar, ha ki kynjang jong ki them, ki lum bad ki shnong ki thaw.
