Lucknow, Nohprah:
Ka kynhun jong ki nongïalam ka seng Congress ba la ïalam da u nongïalam ka liang pyrshah ha Lok Sabha u Rahul Gandhi ka la shah pynsangeh bad khang lynti ha ki pulit ka Uttar Pradesh ha khappud Ghazipur ha ka sngi Balang ha ka por ba u leit sha Sambhal.
Ki nongïalam ka liang pyrshah, kynthup ïa ka Priyanka Gandhi Vadra, ki la leit phai noh sha Delhi, hadien ba ki la sah ha khappud Delhi bad Uttar Pradesh kumba ar kynta eiei. La sakhi ïa ka jingdheng kali kaba jur haduh katta-katta ha khappud Ghazipur ha ka surok bah Delhi-Meerut ha ka por mynstep katba ki nongbud jong ka seng Congress ki la ïalum lang ha kane ka jaka ban pyrshah ïa ki jingkhang lynti.
Da ka jingkhapngiah ka surok kali na Delhi sha Uttar Pradesh, ki nongleit nongwan ki la mad ïa ka por kaba eh ban poi sha ka jaka ba ki thmu ban leit.
Ka nongïalam jong ka kynhun thaw aiñ jong ka seng Congress ha ka Ïingdorbar jong ka Uttar Pradesh, ka Aradhana Mishra Mona, ka la pynshisha ha Lucknow, ba ka la dei ban long shi bynta jong ka kynhun ka seng Congress hynrei ka la shah set noh hapoh ka ïingsah jong ka.
Ki hukum khang ki don ha Sambhal ha kaba ka jingkulmar ka la mih ha ka 24 tarik, Naiwieng halor ka jingjurip ïa ka jaka mane blei jong ki Muslim ba la hukum da ka ïingbishar, ha kaba saw ngut ki briew ki la ïap bad kiba bun kiwei pat ki la mynsaw.
Hadien ba la pynsangeh ïa u ha khappud Ghazipur, u Rahul Gandhi u la ong ba u la pynkhreh ban leit marwei sha Sambhal ryngkat bad ki pulit, hynrei ym shym la shah ban leh kumta.
Ki nongïalam ka BJP ha Uttar Pradesh ki la pynrem ïa kane ka jingleh jong ka seng Congress kum ka “drama” kaba thmu ban “pynsngewbha ïa ka Vote Bank jong ki Muslim”.
