Guwahati, Nohprah:
U Myntri Rangbah ka Assam, u Himanta Biswa Sarma, u la kynthoh jur ïa u Rahul Gandhi, uba long u nongïalam jong ka seng Congress, halor ka jingkynnoh jong u ha Parliament, ha kaba u la ong ba ka long kaba “ishyrkhei haduh katta katta” bad dawa ban panmap noh mardor.
Ha ka kyrwoh ba la pynsaphriang ha ki Social Media, u Sarma u la kynnoh ba u Gandhi u la leh ïa ki kam bym ïahap, da kaba kynnoh ba u la pynmynsaw ïa ar ngut ki dkhot ba rangbah jong ka Parliament bad u la pyrta ruh da ki kyntien ba pyrshah ïa kawei ka MP na Nagaland.
“Ka jingleh jong u Rahul Gandhi ha Parliament ha katei ka sngi, kaba pynmynsaw ïa arngut ki MP ba kham rangbah bad pyrta da ki kyntien ba pyrshah ïa kawei na ki para kynthei jong ngi na Nagaland, ka MP badonburom – ka long kaba pynkulmar jingmut shibun,” la thoh u Sarma.
U Myntri Rangbah ka jylla u la pynrem jur halor kane ka jingjia, da kaba pynskhem ba kum kine ki jingleh kim lah ban pdiang ha ka synshar paidbah. “Kane ka long kaba sngewsih shibun, bad nga pynrem jur halor jong ka,” u la bynrap.
Ka jingdawa jong u Sarma ban panmap ka pynpaw ïa ka jingïakynad kaba nang jur hapdeng ka BJP kaba bat ïa ka jingsynshar bad ka seng Congress, ha kaba ki jingkynnoh kiba ïalam bakla ki la pynjur ïa ka jingkhluit ha ka kam saiñ pyrthei.
Haduh mynta ka Congress kam pat ai jubab halor ka jingkren jong u Myntri Rangbah lane ïa ki jingdawa ban panmap.
