Tura, K’lyngkot 10
Uwei u rangbah hapdeng ka rta 55-60 snem na North Garo Hills (NGH) u la shah kem noh hadien ba u la thmu ban thombor ïa kawei ka khynnah kaba dang hapoh 18 snem ka rta.
La kynnoh ba katei ka jingjia ka la jia hapdeng ka 27-28 tarik u Nohprah mynshem snem wat la ïa ka jingmudui la ujor tang kumba ar sngi mynshuwa.
Ka jingshah kem kaba la jia ar sngi mynshuwa, ka 8 tarik Kyllalyngkot ka la urlong hadien ba la kynnoh ba ka don ka jingpyrshang da ki nongshong shnong ban pynbeit ïa katei ka kam. Hashuwa, ym shym la pynngat mukotduma, hynrei ynda u DCPO bad ki pulit ki la ïoh jingtip, la pynngat mukotduma mardor halor katei ka jingjia bad la kem noh ïa uba shah kynnoh donkti ha kane ka kam.
Hashuwa, ar tylli ki kynhun seng, ka AIJIF bad AYWO ki la phah ïa ka kyrwoh pynrem pyrshah ïa utei uba shah kynnoh donkti sha u DCPO – NGH bad kyrpad pynshitom pyrshah ïa u.
Katkum ka jingtip ba la ïoh, utei uba shah kynnoh u la pynbiej ïa katei ka khynnah ha shuwa ban teh ïa ki kti ki kjat jong ka bad hadien kata u la pyrshang ban thombor ïa ka.
Haba ïadei bad kane, la dep ban pynngat mukotduma pyrshah ïa utei uba shah kynnoh donkti. Kane ka mukotduma ka hap hapoh ka POCSO.
“La pynngat mukotduma bad la kem ïa uba shah kynnoh donkti. I kumba ka la don ka jingpyrshang ban buhrieh ïa katei ka jingjia lyngba ka jingïapynbeit hynrei ynda ngi la ïoh jingtip, ngi la pynngat ïa u nongleh kam sniew hapoh ki kyndon aiñ kiba dei”, la pyntip u SP ka distrik, u Swapnil Pawar.
