Jowai, K’lyngkot 15
Ka Meghalaya Pradesh Congress Committee (MPCC) ha ka 14 tarik mynta u bnai ka la ïoh ban pynithuh ïa ki 17 ngut ki kyrtong ban ïakhun ïa ka ilekshon MDC sha ka Jaiñtia Hills Autonomous District Council (JHADC).
Ïa kine 17 ngut ki kyrtong la pynithuh da u MP barim jong ka Shillong bad u President ka Meghalaya Pradesh Congress Committee (MPCC) u Ma Vincent H Pala ha ka jingïalang kaba la long ha CTC Orchid Inn Thadlaskeiñ.
U Ma Vincent H Pala haba kren halor ka District Council, u la ong kumba long mynta, ka District Council kam lah ban siew tulop ïa ki nongtrei bad shisien bym ïoh tulop ka synshar-khadar ruh kam long shuh kaba biang.
U la pynskan ruh ba naduh bym synshar shuh ka Congress, ka jinglong jingman ka synshar-khadar hapoh ka Jylla Meghalaya ka long kaba tlot haduh katta-katta.
U la khot ka jingïatreilang jong baroh ki nongkyrshan jong ka seng ban long kiba trei shitom khnang ba ka Congress kan poi sha ka thong.
Katba u kyrtong MDC ka Congress na Saphai Sahsniang bad President ka Mowkaiaw Block Congress Committee Ma Rikut Parien u la ong, kane ka dei ka sien kaba ar ba un ïakhun ha ka ilekshon MDC halor ka thong ban pynkhlaiñ ïa ka synshar-khadar hapoh ka District Council, ban ïada ïa ka hok halor ka khyndew ka shyiap, ka riti dustur bad ka jinglong kyrpang jong ka jaidbynriew.
U la ïathuh ba ka daw kaba pynlong ïa u ban ïakhun na ka Congress, namar ka dei tang ma ka, ka seng kaba ïeng ha ka nongrim kaba skhem khlem ban ai ka jingsynshar laitluid ïa ki nongshong shnong ka ri India khlem ka jingsngew ïapher ha ka liang ka jingngeit niam, hapdeng ki nongkyndong ki nongsor bad uba duk bad riewspah.
“Tang ka Congress kaba lah ban wanrah ïa ka jingsynshar da u paidbah ïa u paidbah na ka bynta u paidbah hynrei kaba ima ha kine ki sngi kiwei ki seng kiwei ki Sorkar ki buh ïa ka jaidbynriew ha ka jingma”, la ong u Ma Parien.
Ki 17 ngut kyrtong ki kynthup ïa u Ma Madonbai Rymbai na Amwi Khliehtyrshi, Bitos Sari na Mukhla-Ummulong, Jona Rynjah na Moodymmai Nongkhroh, Katbanbiang Lamare na Nartiang Wahiajer, Richard Sing Lyngdoh na Mynso Nongjngi, Rikut Parien na Saphai Sahsniang, Welpard Suchiang na Raliang, J. Treilang Suchiang na Shangpung, Saron Paswet na Jowai South, Yookini Phawa na Muthlong-Sohkymphor, Siril Suja na Sutnga Nongkhlieh, Lalwilliama Thiaite na Saipung Nongkhlieh, Grimlang Dkhar na Narpuh, Bashan Tangliang na Sumer, Brosent Siangshai na Musniang Rangad, Pynbiangmi Laloo na Mowkaiaw bad ka Kong Banikas Laban na Barato Mukroh.
