Imphal, Kyllalyngkot:
Ha ka jingkhynra lang kaba la long ha kine 24 kynta ba la dep, ka kynhun ba la ïatreilang jong ki bor pahara jong ka jylla bad ka sorkar kmie ki la kem ïa ar ngut ki dkhot jong ki kynhun bapher bapher ba la shah ñiew beaiñ na ki jaka ba kyrpang ha Imphal East distrik, Manipur. Katkum ka kaiphot jong ki pulit, la ïathuh ba uwei u dkhot jong ka Revolutionary People’s Front (RPF)/People’s Liberation Army (PLA) ba la shah ñiew beaiñ ki la shahkem hajan Mayanglambam Lampak ha Top Khongnangkhong, hapoh thanat Porompat. Utei u briew dei ba la tip kyrteng kum u Yengkhom Bhogen Singh (50), uba shong ba sah ha Lillong Chajing Awang Leikai, Imphal West. Ki bor pahara ki la ïoh kurup ïa kawei ka Mobile Handset, kawei ka Wallet kaba don T. 1,500, bad kiwei kiwei ki tiar pyndonkam shimet na u.
Ha ka jingkhynra ba kyrpang ha katei kajuh ka sngi, ki bor pahara ki la kem sa uwei pat u briew ba la tip kyrteng kum u Pukhrambam Thoiba Singh uba la tip ruh kum u Khairakpa (38), uba dei u dkhot ba trei shitrhem jong ka KCP-MFL ba la shah ñiew beaiñ. Kane ka jingshah kem ka long ha Mantripukhri Bazar kaba don marpyrshah bad ka E-Cube Department Store, kaba don hapoh Heingang Police Station.
