Agartala, Kyllalyngkot:
Ka sorkar Tripura ka dang pynkhreh ban pynlong ïa ka ‘Destination Tripura Business Conclave 2025,’ kaba ar sngi kaba dei ka jingïalang jong ki nongkhaïi, ka ban sdang ha ka 7 tarik, Rymphang ha ka nongbah Agartala jong ka Tripura.
La khmih lynti ba kane ka jingïalang kan ïalam sha ka jingsoi ïa ki MoU kiba shongdor kumba T. 600 klur bad ki nongbei tyngka bapher bapher. Ha ka sngi Balang, ka Myntri ka Industries and Commerce jong ka Tripura, ka Santana Chakma, ka la kren sha ki lad pathai khubor, da kaba batai bniah ïa kane ka jingïalang bad ki jingthmu kiba ïadei bad kane.
Ka la pynpaw ruh ïa ka jingïalang jong ki karkhana bad ka khaïi pateng jong ka jylla kaba man la u snem, kaba la buh ban pynlong ha ka madan jong ka International Fair ha Hapania, Agartala, naduh ka 29, Kyllalyngkot haduh ka 12 tarik, Rymphang. “Ngi la pynlong ï alai tylli ki jingïalang ban pyntikna ïa ka jingjop jong kane ka kam khaïi ha une u snem,” la ong ka Myntri.
“Ngi buh jingmut kyrpang ïa ki nongkhaïi bad ki kam khaïi trai ri. Ha u snem ba la dep, ki don 269 ngut ki nongïashim bynta kiba la pyni ïa ki mar jong ki, bad mynta u snem, ka jingkheiñ ka la kiew sha ka 337 ngut. Ka jingkyrshan ïa ki nongsengkam lajong ka long kaba hakhmat eh, katkum ka jingthmu jong ngi kaba long ‘Ek Tripura Shrestha Tripura’. Mynta u snem, ngin buh 515 tylli ki Stall, haduh 515 tylli, na ka 465 ha u snem ba la dep. Ki mar kiba shongdor T.6.12 klur la die ha u snem ba la dep, bad ngi khmih lynti ba ka jingdie kan kham heh shuh shuh ha kane ka kynti,” ka la bynrap.
Ka ‘Destination Tripura Business Conclave 2025’ ka don jingthmu na ka bynta ban khring ïa ki nongbei tyngka bad ban kyntiew ïa ka jingroi jong ki karkhana jong ka jylla. Kane ka jingïalang kan pdiang ïa ki 150 ngut ki nongbei tyngka na ki bynta bapher bapher ha Hotel Polo Tower naduh ka 7 haduh ka 8 tarik u Rymphang.
“Ka thong jong ngi ka long ban pynkhlaiñ ïa ka jingïakren bad ki nongbei tyngka bad ban pyni ïa ki marpoh khyndew kiba bun jong ka jylla,” la batai ka Chakma.
“Ka jingialang kan pynleit jingmut ha ki bynta kum ka koit ka khiah, ka IT, ka jingpynkhreh ïa ki marbam, ka pule-puthi, ka kam jngohkai pyrthei, ki dieng jri, ki siej, bad Agar.