Kane ka jingkieng lane ka pyrnon diengjri kaba don shaphang sepngi na shnong Thangrai kaba mih na khap ki arliang ki maw siang ha lynti ban leit hiar shapoh Bri ba khot ‘SYNRANG WAHTIT.’Kane ka jingkieng diengjri ka long kum ka lynti ïaid kjat jong ki briew kiba leit rep shapoh ki Bri ki bsah kiba don sha trai riat sha ki jaka rep.
Kane ka diengjri ka long kum ka jingkieng ban kiew (Ladder) kaba pun lynti ïa kiba leit trei leit ktah shapoh ki lum bad ki jaka rep jong ki briew kiba don shapoh trai riat kane ka lum. Haba ki nongrep kane ka thaiñ ki leit sha jaka rep jong ki ki hap ban leit hiar bad kiew lyngba kane ka pyrnon diengjri kaba mih na khap maw siang bad ïeng shaduh jrong riat ban poi sha jaka madan ba khot pyndentraw.
Kane ka jingkieng kam dei ka jingkieng ban kiew (Ladder) kaba mih napoh trai thliew sha jrong. Ka long thok kum ka pyrnon kaba kiew napoh sha jrong tnum. Kane ka jingkieng diengjri ka pher na ki jingkieng kiba don sha ki thaiñ Ri War Mihngi kum sha shnong Nohriat – Tyrna thaiñ Sohra.
Kiba kwah iohi lane leit peit ïa kane ka jingkieng ki dei ban leit lang ryngkat bad ki briew kiba dei ki trai shong Thangrai.
C. B. Iawphniaw
