Shillong, Ïaïong 11
Ka North Eastern Indira Gandhi Regional Institute of Health & Medical Sciences (NEIGRIHMS) ha ka Sngi Thohdieng ka la pynshai halor ka mat ba ïadei bad ka rukom thungkam thungjam bad ban biang ba ka bud ryntih ïa ki kyndon thungkam ba la buh da ka Department of Personnel and Training (DoPT).
“Haba jubab ïa ki jingpynsngew ba la pynpaw da ki kynhun seng ba kynthup ïa ka HYC-CEC bad ka Khasi Students’ Union (KSU), u Prof. (Dr.) Nalin Mehta, Director, NEIGRIHMS u la pynskhem biang ïa ka jingbud ryntih jong ka shlem treikam ïa ki kyndon thungkam ba la buh da ka DoPT,” ong ka kyrwoh na NEIGRIHMS.
Haba pynshai halor ki mat ba ïadei bad ka jingpynrung kam kaba dang ïaid mynta, ka kyrwoh ka la ong ba ki kam ba la pynbna (ba la pyllait) kim dei na bynta ka jingpynrung kam bathymmai hynrei na ka bynta ki ‘Backlog Vacancies’ ne kiba sahteng, kiba la mih na ka jingbym pdiang, jingbym pynïasoh, jingieh noh kam, lane ka jingbym don ki briew kiba biang ha ki kyrdan bapher-bapher na ki jingpynrung kam ba mynshuwa.
Ka kyrwoh ka ong ruh ba baroh ki jingpynrung kam ha NEIGRIHMS la leh ha ryngkat ka jingpynleit jingmut, bad ïa kane ka jingpynrung kam kaba mynta la leh bad pyrkhing katkum ka ‘Model Roster and Regional Roster’ ba la bthah da ki kyndon ka DoPT, ban pyntikna ïa ka jingbud ryntih ïa ki jingbhah kam na bynta ki SC, ST, OBC, EWS, bad ki PwBD.
Haba jubab thik halor ki jingsngewkhia ba ïadei bad ka jingmihkhmat jong ki ‘riewlum trai-ri, kane ka shlem treikam ka la kdew ba ïa ki jingpynbna na bynta ban thungkam ha NEIGRIHMS la pynmih paidbah ha ki kot khubor trai-ri kumjuh ha ‘Employment News’ katkum ki rukom treikam ba la buh, bad la buh ruh ha ka ‘website’ jong ka shlem treikam ban pynbun ïa ka jingïashim bynta jong ki trai-ri.
Kumjuh, ka bhah na bynta ki OBC bad EWS ka bud pyrkhing katkum ki kyndon ka Sorkar Pdeng bad ki rai jong ka ïingbishar.
Ha kaba ïadei bad ki jingsngewkhia halor ka jingkheiñ kynthei bad shynrang ha ka jingpynrung kam ïa ki ‘Nursing Officer’, la batai ba ym don kano-kano ka kyndon ïa mynta ha ki kyndon thungkam kiba la don lypa na bynta ka jingkheiñ kynthei bad shynrang kaba 80:20.
“Ka NEIGRIHMS ka la kyrpad na ka tnad ka koit ka khiah ka Sorkar India ïa kum kane ka jingpynbeit ha u bnai Naitung, 2024, hynrei ka tnad, ha u bnai Nailar, 2024 ka la ai jingmut ban ym shim ïa kaba kum kane (Ratio). Ka jingkyrpad ha ryngkat ka jingpynshisha kaba khlaiñ na ka bynta kane kajuh la phah sha ka tnad ha kine ki ar sngi ba la dep,” la ong ka kyrwoh.
Ha kaba ïadei bad ka jingeh jong ki jaka thoh eksamin na ka bynta ki Computer-based Test (CBT) ki ban sa pynlong da ka HLL Life Care Limited, ka PSU ka Sorkar Pdeng, la buh ïa ki sienjam ban pyndap katba lah ïa ki nongaplai trai-ri kiba biang na Meghalaya ha ki jaka thoh eksamin ha Meghalaya.
Ha kajuh ka por, ka la ong ba ki kyrtong kiba palat ïa ka jingbun briew ha Meghalaya, ha kawei ka liang kin hap ban ïakhun ïa ka ‘Test’ ha ki jaka thoh eksamin ba marjan, nuksa kum ha Guwahati, Assam.
Nalor kata, ïa ka eksamin ha kane ka kynti yn pynlong da ka NEIGRIHMS lyngba ka tnad ba la kdew haneng, ym lyngba ka NORCET kumba la leh ha ka jingpynrung kam kaba la dep.
Shuh shuh la ban jur ba ki rukom treikam kiba khlaiñ ki don ha NEIGRIHMS ban pyntikna ïa ka jingshngaiñ jong ki nongpang, ban pynneh ïa ka jingshngaiñ hapoh ki jaka sumar, bad ban pynbiang ïa ka jaka kaba shngaiñ, khamtam eh ïa ki nongtrei kynthei bad ki nongpang.
“Ha kaba kut, ka NEIGRIHMS ka kut jingmut ban ïaineh ha ki rukom thung kam kiba shai, kiba hok, bad kiba kynthup lang ha ryngkat ka jingbud pyrkhing ïa ki kyndon jong ka Sorkar Pdeng,” ong ka kyrwoh.
