Shillong, Ïaïong 15
U MP jong ka Congress na Tura Parliamentary constituency, Saleng A Sangma u la ther tyngeh ïa ka kot ïarap ‘CM Impact Guidebook’ kaba ïarap pynpass ïa ki khynnah klas 10, da kaba u la ong ba kan pynjot ïa ka pule puthi ki khynnah ka Jylla ha ki sngi ban wan.
Haba kren bad ki lad pathai khubor, u Saleng u la ong ba wat ki bym ju leit sha skul ruh, ki pass matrik thik-thik namar kane ka CM Guidebook, bad kane ka dei ka jingma ïa ka lawei ha ka pule puthi.
“Kane ka jingleh jong ka sorkar ka dei ka jingleh kutlad ban pynpaw ïa ka Jylla shabar, hynrei ka dei kaban tan arsut pynban ïa ka Jylla pat,” u la ong.
U la ong ba ki kmie ki kpa ki phah skul ïa ki khun ba kin nang kin stad, kin tip ïa ka akor ka burom bad ban lum ïa ka jingnang jingstad, hynrei da kane ka CM Guidebook kaba la don lypa ka jubab, tharai ki khynnah ki dang donkam ban leit sha skul hadien-habud lane ki dang donkam ïa ki kot pule.
“Phi tharai ba kine ki khynnah kin dang pyrkhat ban khreh kot hadien-habud? Kin shim beit tang da ka CM Guidebook ban pule kaba la ïoh lut ïa ki jubab. Haba ki la ïoh lypa ïa ki jubab kin pyndonkam leh aïu ïa ki kot pule bad kin donkam leh aïu ban leit sha skul ruh, kin shu shim beit da ka Guidebook ha ka por eksam. Wat ki bym leit skul ruh ki pass matrik ha kane ka snem,” la kynthoh tyngeh u Saleng.
U la ong shuh-shuh, kaba eh ka long ba kane ka jingleh jong ka Sorkar ka long kumba pynlong mraw ïa ki samla ha man la ki kam, namar ba kan long kaba eh ban leit ïakhun ïa ki eksamin shabar Jylla nalor ba ka Jylla ka la budnam ha ka jinghiar ka pule puthi.
“Kin leit hylla ha man la ki ‘concert’ hadien ba ki pass ïa ka eksam bad ha kaba kut pat kin ym ïoh kam, kin shu long mraw ha baroh ki liang,” la ong u Saleng.
