Aizawl, Nailar:
Ka sorkar Mizoram ka la kyntait ïa ki jingkynnoh ba ka thmu ban pynkynriah ïa ka nongbah jong ka jylla na Aizawl sha Thenzawl ha Serchhip distrik.
Ha ka jingpynbna paidbah, ka sorkar ka la pynshai ba ka jingkulmar ka la mih na ka jingbakla ha ka shithi ba la pynmih da ka Union Ministry of Housing and Urban Affair.
Kane ka shithi, ka dei kaba la thoh ha ka 24 tarik, Ïaïong, ka dei kaba la thoh sha u Chief Secretary ka Mizoram bad sha u Resident Commissioner jong ka jylla ha Delhi.
Ka la kdew ïa ka “jingkynriah ïa ka nongbah jong ka jylla na Aizawl sha Thenzawl” bad pan ïa ka Detailed Project Report (DPR).
Ka tnad pynroi sor bad pynduna ïa ka jingduk ka la pynpaw ba katei ka shithi ka dei ban ïadei bad ka projek “Thenzawl Peace City” ym ban pynkynriah ïa ka nongbah.
Ka tnad ka la mynjur T.10 klur na ka bynta ban pynkhreh ïa ka DPR na ka bynta katei ka projek ba la tyrwa.
Ka Thenzawl ka dei ka nongbah kaba dang shah khmih bniah ha ka jingdon jong ki paid nongshong shnong kaba don kumba 93 km eiei na Aizawl bad ka hap hapoh ka Serchhip konstitwensi, kaba la mihkhmat da u Myntri Rangbah ka jylla u Lalduhoma.
Kane ka jingpynshai ka long hadien ba ka liang pyrshah ka Mizo National Front (MNF) ka la kynnoh iï u Myntri Rangbah ka jylla ba u la pyrshang ban pynkynriah ïa ka nongbah khlem da pynpaw paidbah.
Kham hahwa, u Myntri Rangbah ka jylla u la pynbna ïa ka jingthmu ban pynroi ïa ka Thenzawl bad ki jaka ba marjan kum ka ‘Peace City’ bad pynpaw ïa ka jingkyrmen ban ïoh ïa ka jingïarap na pdeng na ka bynta kane ka jingthmu.
Ka sorkar jylla ka la pynthikna ba katei ka jingthmu ka dei na ka bynta ka jingpynroi sor bad kam don jingïadei bad kano kano ka jingkylla ha ka kyrdan jong ka nongbah jong ka jylla.
