Raphael Warjri
Ki don byllai ki nuksa ha ka ktien Khasi ba dei ban kdew, hynrei yn jied tang ïa ki bynta kiba kham donkam ban sngewthuh ïa ka rukom pyndonkam ïa ki ktien lada dei ha ka kren ka thoh ne ka pule. Ki kyntien- ei ei, lei lei, mar mar, khala khala, khum khum, bak bak, kloi kloi, thar thar, daiñ daiñ, shaid shaid, kiwei kiwei, hir hir, jai jai, dar dar, nai nai, tok tok, laiñ laiñ, mian mian, tiak tiak, ter ter ki dei ki kyntien kiba donkam ban pyndonkam shijur ban mih kawei ka jingmut, namar lada dei tang shi kyntien ki la mut da kumwei pat. Kine ki shijur ki kyntien kiba dei pat tang kawei ka jingmut ha ka ktien Khasi, ki long ki ktien ba dei ban pynthikna ha ka thoh ka tar bad ha ka thohkot thohsla ba yn long salonsar ka jingmut bad ka jingtip ha ka pateng. Kawei pat ka bynta kaba ym dei ban sngewthuh bakla ba kine ki shijur ki kyntien ki ïapher na ki ktien kynnoh, namar ha ka ktien kynnoh lah ban don ka jingïadei hynrei ka kyntien ka pher kawei na kawei pat. Kine ki shijur kyntien ki lah ruh ban dei ïa ki kyrteng ba khot ïa ki briew ha ka jingïadei ban kam ha ka imlang sahlang khamtam ïa kiba dang ïadei shibahaïing bahasem ha ka kur ka jait. Kita ki long kum ki kyntien bah bah, thei thei, kong kong, nah nah, mei mei, pa pa, hep hep, lung lung, deng deng, duh duh, mai mai, san san. Nalor kata ka don sa kawei ka bynta ha ka ktien Khasi ba kine ki shijur ki kyntien lah ban pynwandur sa da kumwei pat ba yn mih sa da kawei pat ka ktien kaba don la ka jingmut lajong, ka ba ym don jingïadei ei ei lada buh tang shikyntien lane shijur.
Kita ki kyntien ki long kum ka ktien bak-ly-bak, daiñ-ly-daiñ, shaid-ly-shaid, jai-ly-jai, ter-ly-ter, kumno-re-kumno, bad kumta ter ter. Hangne ki don laikynnoh ïa ka kyntien kaba don na sdang bad naba kut ba la bynrap hapdeng da kawei pat ka rukom pynsnoh dak kaba ym dei ka ktien. Kane ka rukom pynsnoh laikynnoh ki kyntien ka don bun rukom ba ju pyndonkam ha ka ktien Khasi la kaba kren ne kaba thoh ba pule. Lait na kaba pynsnoh da ka tien-snoh ‘ly’ ki don ruh ki kyntien ki ba pynsnoh da ka kyntien ‘pa’ ne ‘la’ wat lada dei na ki juh ki shijur kyntien, ki lah pat ban kit jingmut da kumwei. Kita ki kyntien ki long kum ka ktien bin-pa-bin, jai-pa-jai, jai-ly-jai, khyndiat-pa-khyndiat, mian-pa-mian, tiak-pa-tiak, pateng-la-pateng, tem-ly-tem, jer-ly-jer, suki-pa-suki bad kumta ter ter. Ym lah ban jer lut hangne hynrei la shu kdew bad shim nuksa tang ban sngewthuh ïa ka rukom pynshong bad pynshoh ktien ha ka ktien Khasi. Ha ba kdew ba shikyntien ka thew jingmut da kumwei bad lada buh shijur ka kit jingmut da kumwei pat bad don ruh ki ktien ba ym don jingmut eiei tang marwei shikyntien bad sa kit jingmut tang lada dei shijur.
Ka ktien khala ym don jingmut ei ei, hynrei ynda bynrap shijur khala khala ka don ka jingmut ka ba kdew ïa ka jingmut ba shen shen. Ka ktien bin ruh ym don jingmut, hynrei ynda la pynshong kyntien bin-pa-bin ka kit jingmut ïa kaei kaei kaba jied shiah sani. Ka ktien ter ruh ym don jingmut, hynrei lada bynrap shijur ka kyntien ter ter ka la kit jingmut ba long mar bud ryngkhi khlem lah ban antad ïa ka ba kut, bad lada ong ter-ly-ter pat ka kit jingmut da kumwei wat la ka ïa syriem ha kawei ka liang, kaba mut ba don lynter taid. Ka ktien ei ka mut ïa ka ba ioh khlem da pan ne khmih lynti, bad kawei pat ka jingmut ka dei ha ba khot ïano ïano ki ba ym pat tip kyrteng ne ki kynja riew phylla, katba shijur ka kyntien eiei ka mut ba suba ne antad ïa kaei kaei kaba lah ban don ne ym don. Ka ktien mar ka don bun jingmut, kawei ka mut ïa ka kynja tiar ha ba ong ka mar ka mata, nangta mar ka mut ruh ïa ki briew ba radbah kiba heh met bad bakhlaiñ bor, hynrei lada ong mar mar pat ka la thew noh da kumwei ka jingmut ba long khala khala. Ka ktien daiñ ka mut ba ot pyndkut da ka wait, hynrei daiñ daiñ ka mut ba tied stet marbud, bad ha kawei pat ka liang haba ong daiñ-ly-daiñ pat ka la kit jingmut pat sa da kumwei, kata ka mut ïa kaba iar ngit-ly-ngit ha ka mariang. Ka don sa kawei pat ka bynta ha kaba pyndonkam ia ka kyntien ba pun pynsnoh ïa ki arkyntien- kata ‘ly’, ‘pa’, ‘re’, ‘la’; ba lah ban pyndonkam palat na kawei ka tienpun pynsnoh bad ka kit jingmut da kumwei. Ka ktien jai ka mut ba jemnud ne jynsur mynsiem ba ym don kano kano ka huri hura, bad jai jai ruh ka kit jingmut kumjuh tangba katkum ka rukom pyndonkam. Nalor kata ka don ruh ka ktien jai-ly-jai kaba mut ba suk mynsiem khlem pyrwa, katba ka ktien jai-pa-jai pat ka kit jingmut ïa kaei kaei kaba long suki suki bad bniah.
Kumta kine ki ktien ki dei ban long kiba dei ban pynshong katkum ba dawa ka ktien bad ha kajuh ka rukom ba dei ban rai shijingmut ban pyndonkam ryntih, khnang ban ym kulmar ka thoh ka tar ka pule puthi. Kata ka lah ban urlong tad haduh ba ki riewteikam (stakeholder) jong ka jingtip bad ka san ka mer ïa ka ktien kin dur-iap ban pynbit pynbiang noh ïa ka rukom pule, thoh bad pynshong ïa ki kyntien ha ka rukom kaba ryntih bad ba shongkun katkum ka saiñdur jong ka ktien tynrai.
