Chennai, Nailur:
Kiba bun na ki nongshong shnong ha ka jylla TN khamtam ha ka thaiñ Nilgiris, ki la pynpaw ka jingsngewnguh ïa ka sorkar jylla hapoh ka jingïalam jong u Myntri Rangbah u MK Stalin, hadien ba u la dep ban pynbna bun tylli ki jingpynbna na ka bynta ki briew jong ka distrik Nilgiris ha kaba ïadei bad ki lad ai jingïarap ïa ki khamtam eh na ka bynta ban pynshna ïa ki ïing katkum ka jingdonkam.
Haba kren ha ka jingïalang kaba la pynlong ha ka Arts College jong ka sorkar ha Ooty, u la ong ba yn buh ïa ka Tribal Museum bad ka jaka wad bniah ha katei ka distrik ha ka jinglut kaba T.10 klur bad yn shna 300 tylli ki ïing na ka bynta ki briew kiba khlem ïing khlem sem ha Gudalur ha ka jinglut kaba T.26.6 klur.
U Myntri Rangbah u la ong shuh shuh ba yn shna ïa ka jaka ïeng kali kaba bun kyrdan ha ka jinglut kaba T.20 klur ha Ooty. Ban pynshlur ïa ki nongjngohkai pyrthei, yn ai pisa T.5 klur sha ka TNSTC ban pynïaid ïa ki 10 tylli ki jaka leit jingleit.
Kumjuh ruh yn shna 200 tylli ki ïing ha ka jinglut kaba T.10 klur bad 23 tylli ki Community Hall yn tei ha ka jinglut kaba T.5.75 klur na ka bynta ka jingmyntoi jong ki riewlum kiba sah ha ki jaka sor jong ka distrik. Shuh shuh, u la ong ba ïa ka Gene Pool Park ha Naadukani yn pynbha ha ka jinglut kaba T.3 klur.
Haba pynpaw ïa ka jingdon jong ki nongïoh jingmyntoi na ki katto katne ki skhim sorkar ha Nilgiris ha kine ki saw snem ba ladep, u Stalin u la ong, “Haduh mynta ki don 5.96 lak ngut ki briew ha ka distrik kiba la ïoh jingmyntoi hapoh ka Makkalai Thedi Maruthuvam.
U Stalin u la ong ruh ba 16 hajar ngut ki kynthei ki ïoh ïa ka bainong kaba T.1 hajar man u bnai bad 735 ngut ki samla pule ki ïoh T.1 hajar hapoh ka Tamil Puthalvan bad 771 ngut kiba ïoh jingmyntoi na ka skhim Pudhumai Pengal. La tyrwa ïa ka Arts bad Science College ha Coonoor bad la mang T.70 klur ban buh ïa ka Eco park ha Ooty, ha ka mang tyngka jong u snem 2025-26.
Kumba la ïathuh, la ong ba ki la don katto katne na ki skhim ba la dep ban pynbna kiba la sdang treikam bad nangne shakhmat ka jingkular kan sa urlong khamtam na ka bynta ban pynbiang lut sha baroh kiba donkam.
