Ka jingmih jong ki surok rong na uwei u snem sha uwei pat ka la nang pynitynnad ïa ki shnong ki thaw bad ruh ban pynsuk shi katdei eh ha ka leit ka wan jong ki nongleit nongwan bad khamtam lei ha ka kit ka bah bad ka pang ka shitom. Ngi ïohi ïa ki projek surok kiba bun kiba la wan hapoh ka Jylla khamtam lei ki surokbah, kiba la wanrah ïa ka jingkiew ha baroh ki liang la ka dei ha ka ïoh ka kot ne ha ka roi ka par nalor kiwei kiwei. Ka jingwan jong ki surok ka la long shisha ka jingkyrkhu kaba khraw ïa ki paid nongshong shnong ha ki bynta bapher bapher jong ka jylla bad khamtam lei sha ki shnong kiba kham long kyndong bad khamtam ruh sha ki jaka ba don ki jaka jngohkai pyrthei kiba itynnad na ka bynta ban khring ïa ki briew kiba nabar.
Hynrei kaba sngew phylla bad sngew lyngngoh ka long ba kine ki surok kiba ïong khrik khrik bad itynnad bha hadien ba la dep shna, tang katto katne bnai pat ki la kylla dur. Don ki bynta ha kaba long kumba mih ñiangthoh lieh ne ka rukom jot kaba paw ki maw bad khyndew, don ki bynta pat jong ka surok kiba mong, kata kiba pei thliew kum ki pung rit hapdeng surok. Ngim lah ban sngewthuh ba balei kine ki surok ki duh bad sniew kloi, hato ka dei kaba shu trei tang dep rukom ne kiei kiwei pat ki daw. Ngi ju ïoh ban sakhi ba katno ka wanrah ka jingkmen bad ka dur phuh samrkhie ha kito ki shnong ne ki jaka kiba wan ka surok thymmai. La ka dei ka surok rong ne ka surok dewbilat ruh kumjuh ne ki surok ba pyntrei lyngba ka skhim MNREGS kiba la long shisha ka jingkyrkhu ïa ki nongshong shnong hynrei ngi shem ba kine ki surok tang hadien katto katne bnai ne snem ki la jot bad sniew bad ïa kane lah ban sakhi kat shaba phai, la ki dei ki surok bha kiba la shna da ki kompeni ne ki surok kiba la shna da ka tnat PWD bad wat ki surok job card ruh kumjuh.
Katkum ka jinglah ban sngewthuh, kham bun na ki surok kiba jot bad sniew noh, ka dei ka jingbym biang jong ki nala pyntuid um. Ngi ju sakhi ba tang la dei ka aiom slap, kiba bun ki surok ki kloi ban sniew bad dap um. Kaba ju pynsohsat shi katdei eh ïa ki nongleit nongwan, ym dei tang ki nongshong kali kiba mad jingeh, hynrei ka wanrah ruh ïa ka jingsniew kloi jong ki kali. Kum ka tnat kaba shna ïa ki surok ka dei ban wad ki daw bad pynshai sha ki paidbah ba balei kine ki surok kiba shna thymmai ki jot bad sniew kloi. Balei ym lah ban pynneh kumba ka long da ki bun bun snem, balei tang wan ka aiom slap, ki la jot noh. Hato ka dei ka jingshna bad trei torti jong ki kompeni ne ki kontraktor kiba shim ïa ka kam, kaba dei ruh ka jingkylli kaba ju mih manla ka por. Ngi ju sakhi ba ki sengbhalang ki ju pynpaw na ka por sha ka por lyngba ki lad pathai khubor ïa ka jingsniew jong ki surok ha kylleng ki bynta bad ki shnong khamtam lei sha ki thaiñ nongkyndong. Kat shaba ngi ïaid ngi ïeng ngin lap beit ïa ka jingjot bad pei thliew jong ki surok. Ngi ju shem ruh ba ka jingmaramot ïa kine ki surok kam long kloi bad I kumba na ka liang ki nongpyntrei ki ap haduh da la jot kham heh ba kin sa sdang ban maramot.
