Agartala, Naiwieng:
Ka sorkar Tripura ka la pynmih ïa ka skhim ban kyntiew ïa ka jingpynmih phan da kaba pyndonkam da ka rukom jong ka Aeroponic Rooted Cutting (ARC) kaba ai jingmyntoi ïa ki 6,000 ngut ki nongrep da ka jingkyrshan pisa bad ki tiar pyndonkam. Ka rukom pyndonkam da ka ARC ka pynkiew shibun ïa ka jingmih phan na ka 2,500-3,000 kg sha ka 9,000 kg haduh 10.000 kg ha ka shi kani, kaba pynduna ïa ka jingpynpoi mar namar bad ka ban lah ban kyrshan ïa ka ïoh ka kot jong ki nongrep. Ka jingthmu kaba kongsan halor kane na ka bynta ka Tripura ban ïoh ïa ka jinglah ban pyndap ïalade ha ka jingpynmih ïa u phan symbai ha u snem 2028-29 bad ka jinglah ban pyndap pura ïalade ha ka jingpynmih ïa u phan ha u snem 2029-30.
Ha ka sienjam kaba kongsan ban kyntiew ïa ka jingpynmih phan ha Tripura, ka sorkar Jylla ka la pynbna ïa ka jingkyrshan kaba khraw ha ka liang ka pisa bad ki tiar ïa ki nongrep kiba shim ïa ka rukom rep ARC (Aeroponic Rooted Cutting).
Haba kren sha ki lad pathai khubor ha Secretariat ha ka 6 tarik Naiwieng, u Myntri ba dei khmih ïa ka rep ka riang u Ratan Lal Nath u la ong ba baroh ki nongrep ha kylleng ka jylla kin ïoh ïa ka jingïarap mynta u snem hapoh kane ka skhim. Uwei pa uwei u nongrep un ïoh T.2,000 kum ka jingkyrshan pisa ba la thep beit beit ha ki bank Account jong ki, ryngkat bad ki tiar rep kiba shongdor T.1,000. Ka jingpynlut baroh jong ka sorkar na ka bynta kane ka jingthmu kan long kumba 1.8 klur tyngka. U la ong ba mynta, kumba 23,700 ngut ki nongrep ki rep ïa u phan ha kylleng ki 47,341 kani ki jaka ha Tripura.
