Ka kamram ki kmie ki kpa ka long ba kin ri kin sumar bad pynheh pynsan ïa ki khun. Kin ai jingnang jingstad bad phah skul ïa ki ba kin nang ban ieit ïa ki kmie ki kpa bad ïa ki para briew kumjuh. Ki kmie ki kpa kin hikai ïa ki khun naduh dang rit ba kin burom ïa kiba la kham heh kham san ïa ki.
Ki khun ki dei ban bud ïa ka jingsneng jingkraw ki kmie ki kpa ha ka lynti kaba dei. Ki dei ban don ka mynsiem sngewrit bad long tipbriew tipBlei. Ki dei ruh ban don ka mynsiem ïarap para briew ha ka khia ka shon. Ki khun ki dei ban long kiba im tip sngi bad ki dei ban don ka mynsiem pynjan paralok parajor. Kim dei ban don ka mynsiem bishni pihuiñ para briew. Ka kamram ki nongsharai balang ka long ba kin peit bad leit pynbaptis ïa ki para bangeit, kin leit sakhi ban pynïathoh shongkurim ïa ki khun samla ka balang, bad kin leit ruh ban ai jingduwai ha ki ïing ki sem ki para bangeit ba don kiba khlad noh na kane ka pyrthei. Nangta ki dei ruh ban ïalam jingrwai ha ki jingïaseng ban ïaroh ïa u Blei. Bad ban duwai pynshai bad pyntngen ïa ka jingngeit jong ka balang ban shakri ïa u nongpynim jong ngi ki briew ha kane ka pyrthei.
Kaba kongsan tam eh ka long ba ki kmie ki kpa bad ki nongsharai balang ki dei ban im ka jingim kaba khuid basngur ïalade khnang ba kin ioh jingshañiah bad lah ban ïalam ïa kiwei. Kane ka dei ka kamram jong ki kmie ki kpa bad ki nongsharai balang.
C. B. Iawphniaw
