Katba ki por ki dang ïaid, ki jingkylla ruh ki la nang ïaid katkum ka jingïaid jong ka juk la haba phai sha kano-kano ka liang ruh bad wat ka jinglong jong ki briew ruh ka la nang kylla. Lehse lada peit i kumba ha ka jaka ba kan kylla lang katkum ka jingïaid jong ka juk, ka paw pynban kumba ka nang phet shadien na ka por, ha ka jaka ban ïarap bad burom iwei-ïa-iwei, la leh lyndet pynban kum kito ki bym don satia ïa ka jingnang jingtip.
Haba peit ïa ka jinglong-jingman kaba man la ka sngi, khamtam ha ka leit ka wan, la ju sakhi ba kam don shuh kata ka jingburom markylliang ne ïarap, hynrei baroh- baroh ki la shu ïa kyrkieh lut ban poi sha ki jaka ba ki thmu khlem da peit sha kadiang kamon hynrei ban bsuh beit kat naba lait ban ïaid bad rung bad kane ym tang ba ka wanrah ïa ka jingdheng kali hynrei ruh ka buh ha ka jingma ïa ki nongleit nongwan.
Ngi ïohi ba ka jingpynher ïa ki kali khamtam lei ki arshaka ka la long kaba ishyrkhei bha haduh ba kam ishngaiñ shuh ïa ki briew ba ïaid lynti. La ïohi ba ki arshaka ki la rung ki mih na katba ki mon khlem pyrkhat shuh ïa kiwei. Nalor kane, ka jingpynïeng ïa ki kali bad ki arshaka ruh ka long shisha kaba la shu leh pathar khlem pyrkhat shuh ïa ka ïaid ka ïeng jong kiwei. Kumta ka jingmana kaba la pynmih da ki pulit jong ka East Khasi Hills ka long shisha kaba biang palat bad kaba donkam bha. Hynrei ngi donkam pat ban ïohi ba ïa kine ki jingmana dei ruh ban pyntreikam ym tang ba kin shu long tang ha ka kot. Ka jingpeitngor ka dei ban long bha ha ki thaiñ ïew kum ha Motphran, ïew Mawlong, Stand Jeep, Khyndailad, Polo, Laitumkhrah bad kumta ter ter. Ha kine ki khyndiat tylli ki thaiñ ba la kdew la ju shem barabor ba ka jingpynïeng kali ka long ba la shu leh katba mon da ki nongñiah.
Kawei na ki bynta kaba donkam bha ban peitngor khamtam ha ka por mynmiet ka dei ha ka thaiñ Khyndailad bad Polo. Kine ki ar tylli ki jaka, ki dei ha kaba wat ha ka por mynmiet ruh ki khapngiah da ka jingpynïeng kali kulmar jong ki briew bad khamtam lei kito kiba ïaid beit na ki ‘wrong-side’ bad buh jingma ïa kiba wan na ka liang pyrshah.
Kat shaba ïaid yn lap beit ba ka rukom pynïeng kali ruh ka la long kaba la shu pynïeng beit ha la ka mon khlem da pyrkhat shuh ïa kiwei bad kawei ka daw ruh jong ka jingpynïeng khlem akor, ka dei namar ba ki briew kim kwah shuh ban pynshitom ïa lade ban ïaid hynrei kwah beit ban ïeng hakhmat ki dukan ne ki jaka ba ki leit donkam ban pyndep ïa la ki kam bad kim don jingkhuslai satia, la uba bud nadien u lait ne em ban ïaid lyngba hynrei tangba la biang ïa lade, ki pynïeng beit.
Nalor ka jingpynïeng katba mon, ki don ruh sa ki briew kiba shu leh kyrkieh beit bad wat haba la ïohi bad tip ba ka surok ka long kaba khapngiah bad ym long pynher, hynrei kim don jingkhuslai ne salia ban phrung jubor ne shim pass beit ïa ki kali kiba ïaid nakhmat. Haba don ka jingdheng kali, la ju sakhi ba ki nongñiah ar shaka, kim ju don por ban bud kawei hadien kawei, hynrei ban ïaleh bad pyrshang ban phrung kat naba ïoh haduh ba teng teng wat tang ban ïaid ruh ym lait shuh.
Wat la na ka liang ki pulit pynïaid kali ki la dep ban mana khamtam ïa ki ar shaka ba ki dei ban bud ryntih ïa ki kyndon, kata ban nym ïaid ne rung na ka liang kadiang namar ka la buh jingma shisha ïa ki briew khamtam ïa kito kiba hiar bad kiew kali hynrei kane ka jingbthah bad mana i kumba kam treikam satia namar kim shym la burom satia bad ïaid beit ha la ka mon.
Hooid, kum ha kane ka juk jong ka jingïabeh por baroh ki briew ki ïaleh ban beh ban poi kloi sha ki jaka kaba ki thmu ban leit hynrei kam mut pat haba beh ïa ka por ban poi kloi ïalade kan buh jingma ïa kiwei pat. Kumta donkam ban burom markylliang namar kane ym tang ba kan pyllait na ka jingslem bad kino-kino ki jingjia aksiden kali hynrei kan wanrah ruh ïa ka jingsuk mynsiem ïa baroh lang.
Namar kata, kaba donkam mynta ka long ba na ka liang ka tnat pulit khamtam ki pulit pynïaid kali ki dei ban shimkhia halor kane bad ban leh da kaba tyngeh pyrshah ïa kito kiba pynkheiñ ïa ki kyndon katkum ki Motor Vehicle Act namar lyngba kane ka jingleh ka jong ki, ka jingshngaiñ ha ka leit ka wan ruh kam don shuh, naba ym tip nangno ki wan bad shano kin tur.
