New Delhi, Rymphang:
Ka Myntri Rangbah ka Delhi, ka Rekha Gupta, ha ka sngi Palei ka la pynïaid ïa ka jingïalang jong ka Trans-Yamuna Area Development Board (TYADB) kaba la mynjur ïa ki projek kiba shongdor T. 728 klur.
Ka la ong ba ka jingthmu jong katei ka jingmynjur ka long ban pynsted shibun ïa ka jingstet jong ka roi ka par ha ka thain Trans-Yamuna, kaba don jan shi bynta na ka lai bynta jong ki nongshong shnong jong ka nongbah Delhi.
U Myntri Rangbah ka jylla u la bynrap ba kan ym duna ka jingkyrshan mang tyngka na ka bynta ka roi ka par jong ka thaiñ Trans-Yamuna bad u la bthah ïa ki dkhot jong ka Board ban buh hakhmat eh ïa ki projek katkum ki jingdonkam ba shisha.
Ha kane ka jingïalang kaba la long ha Delhi Secretariat, la ïadon lang da u Myntri ka jylla u Kapil Mishra, Chairman ka Trans-Yamuna Area Development Board bad u MLA ka BJP u Arvinder Singh Lovely, ryngkat kiwei pat ki dkhot ba don burom jong ka Board.
Haba kren ha kane ka jingïalang, ka Myntri Rangbah ka la ong ba ka roi ka par ha ka thaiï Trans-Yamuna ka dei kawei na ki jingthmu ba hakhmat eh jong ka sorkar Delhi.
Ka jingthmu jong ka sorkar Delhi ka long ban kyntiew ïa ka thaiñ Trans-Yamuna haduh katta katta ba ki briew kin jied ban wan shong ban sah hangne da ka jingjied.
Ka la ban jur ba ka jingïahap ha ki kam pynroi ka long kaba donkam bad ba, ryngkat bad ka jingpynitynnad, dei ban buh hakhmat eh ïa ki jingdonkam ba kongsan jong ki nongshong shnong kum ki surok, ki lad pyntuid um, ka jingïada na ka jingtuid um, bad ka jingïaid lynti kaba shngaiñ.
Ka Myntri Rangbah ka la pynpaw ïa ka jingsngewkhia ba ha ka por jong ka sorkar Aam Aadmi Party ba la dep, la pynlong ïa ka Board ban treikam pura, kaba la pynlong ïa ka jingsangeh kaba jan pura ha ka roi ka par ha ka thaiñ Trans-Yamuna, kaba la wanrah ïa ka jingeh kaba khraw ïa ki nongshong shnong.
Ka la pynthikna ba baroh ki kam ba la ai jingmut da ka Board yn pyntreikam bad ba yn ym shah ïa kano kano ka jingeh ha ka liang ka pisa tyngka ban khanglad ïa ki.
Ha kawei pat ka jingpynbna, ka Myntri Rangbah ka la ong ba ka sorkar Delhi kan shna ïa ka Integrated Complex kaba mynta kaba la pyndap da ki tiar kiba thymmai na ka bynta ban pynthymmai bad pynbha ïa ki khynnah kiba ïaleh pyrshah ïa ka aiñ. Ïa kane ka complex yn kyntiew ha ka jaka kaba heh kumba 8 akar ha Alipur.
Kane ka complex kan lah ban pdiang haduh 700 ngut ki khynnah bad kan pdiang ïa kito kiba ap ïa ka jingbishar hakhmat ka Juvenile Justice Board katkum ka aiñ Juvenile Justice Act, 2015, kumjuh ruh ïa kito kiba la lap ba ki leh ïa ki kam runar.
Ka jingthmu jong kane ka jaka sumar kan long ban pynïasoh biang ïa kine ki khynnah sha ka jingim kaba man ka sngi. Ïa kane ka rai la shim ha ka jingïalang kaba la long hapoh ka jingpynïaid jong ka Myntri Rangbah ka Jylla bad ki dkhot jong ka Juvenile Justice Committee.
Ha kane ka sngi la donlang ruh ki heh ophisar jong ka Department of Women and Child Development.
Ka jingïalang ka la kynthup ïa ki jingïakren ba bniah halor ki bynta jong ka aiñ, ka imlang sahlang bad ka jinglong briew kaba ïadei bad ki khynnah, bad la poi sha ka jingïamynjur lang halor ka jingdonkam ban thaw ïa ka rukom treikam kaba pura, kaba shngaiñ bad kaba mynta ha Delhi na ka bynta ki khynnah kiba ïaleh pyrshah ïa ka aiñ.
Hadien ka jingïalang, ka Gupta ka la pyntip ba katto katne ki ïing na ka bynta kum kine ki khynnah ki don mynta ha ki jaka bapher bapher jong ka nongbah Delhi, ha kaba bun na kine ki dei kiba la rim da ki phew snem.
“Namarkata, ka sorkar Delhi ka la rai ban shna ïa ka Integrated Complex kaba thymmai tam na ka bynta ka jaka sah bad ka jingpynbha ïa kine ki khynnah,” ka la ong.
