Imphal, ïaïong:
Ka jingïakynad ka la mih hapdeng ar tylli ki jaitbynriew riewlum ha Manipur ha ka sngi Ba-ar, haba ki pulit jong ka thaiñ ki la pyrshang ban pynkhuid ïa ka jingkhang surok ha ka por ba khang ïa ka jingïakhih ba la khot da ka United Naga Council ha ki khappud jong ka Senapati bad ki distrik Kangpokpi ba marjan bad ka.
Ïa ka jingkhang surok la buh da ki nongtrei mon sngewbha jong ki Naga ban pynjari ïa ka jingkhang dam kaba lai sngi ban pyrshah ïa ka jingshah pynïap jong ki arngut ki briew ha ka jingjia kaba la jia ha ka 18 tarik u Ïaïong, ha Ukhrul distrik, ong ki heh pulit.
Uwei u heh sorkar u la ong ba ka jinglong jingman ka la kylla long kaba jynjar hadien ba ki nongshong shnong Changoubung Kuki ki la ïatyngkhuh, kaba la pynlong ïa ka jingïakawang maw hapdeng ki arliang mamla.
Kane ka jingïakynad ka la wanrah ïa ki jingsyier hapdeng ki nongshong shnong ka thaiñ.
“Khyndiat tylli ki kuli la siat ha ka por ba don ka jingkulmar. Hynrei ym pat lah ban tip mano ba leh ïa kane,” la ong u pulit.
Ka jingkhang khyrdep kaba lai sngi kaba la khot da ka UNC ka la pynthut ïa ka jingim kaba thikna ha baroh ki jaka ba shong ki Naga ha ka jylla, kynthup ïa ka Ukhrul, Kamjong, Senapati, Noney bad Tamenglong.
Ka jingkhang ka la sdang ha ka por shiteng miet jong ka 20 tarik u Ïaïong.
