Watla ka por ban rep ban riang khamtam ïa u kba ka la dei hynrei sngew synei bad sngew sangsot pat ïa ki nongrep ha ka shnong Lapangap, kiba wat haduh mynta kim pat ïoh satia ban hiar sha la ki lyngkha ne ki pynthor ban sdang ïa ka rep ka riang. Ka jingbym pat ïohlad jong kine ki nongrep ka Lapangap ka dei namar ka jingpyrshah jur jong ki shnong Karbi ba don ha kane ka thaiñ bad ka jingkhang jong ki pulit ka Assam, da kaba pynpaw ba kane ka jaka ka dei kaba hap bad don hapdeng ka jingïakajia pud. Ka jingpynïaid ïa ka kam rep ha kane ka jaka kam dei shuh kaba dang thymmai hynrei ka dei kaba kum ki nongshong shnong ka Lapangap ki la rep la da ki phew phew snem. Kumta kumba ka long mynta, ka la wanrah ïa ka dukha mynsiem ha ki nongshong shnong, kiba ym tip shuh lano kin ïoh ban rep bad lada ki ïoh ruh hato kan dang dei shuh ka aiom rep ne kin hap ap tad haduh kawei ka aiom rep ka ban wan. Lada ka long kumta, da kaei kin bam, kin bsa bad pyndap ïa la ka ïing ka sem bad ïa ki kpoh ba thylli ki jong ki.
Halor kane ka bynta, dang ha ka taïew ba la lah, ngi la sakhi ïa ka jingbitar jong ki nongrep bad ki nongshong shnong ka Lapangap kiba la wan tur sha Secretariat namar ka jingbym ïoh lad shuh ban bteng ïa ka rep ka riang. Ka Sorkar na ka por sha ka por ka ju kren bad pynpaw ba ka buh hakhmat eh ïa ki nongrep namar khlem ki nongrep yn nym lah ban ïohi bam ha ki miej. Hynrei kaba sngew sammut ka long ba kine ki jingkren bad pynpaw ki long tang ha ka ktien katba ha ka kam pat kam long satia kumta. Ka kyntien kaba ong, ki nongrep katba nangrep katta ki nang syrdep, imat ka dei kaba don jingmut namar haba mad jingeh ki nongrep, ym ïohi satia ba ka Sorkar kan shimkhia. Ka Sorkar MDA hapoh ka jingïalam u Conrad K Sangma, ka la dei ban shimkhia mardor ïa kane ka kam naduh ki sngi kiba nyngkong haba kum ki nongrep ka Lapangap ki la pynsngew hynrei imat la set kyllut ïa ki shkor bad khapbrip ki khmat.
Balei hap ban da ap haduh ba ki nongshong shnong ne kino kino ki kynhun kin wan tur sha Secretariat. Hato ka Sorkar ka ap beit kmang ban shimkhia ne trei ïa ka kam tad ynda la mih sha surok. Kane ka mat jingeh kaba kum ki nong Lapangap ki la mad ka dei naduh u snem 2023 hynrei balei wat haduh mynta ruh ym lah satia ban leh eiei ne pynbeit. Hooid ngi sngewthuh ba kata ka jingïakren pynbeit pud ka dang ïaid, kan don bynta aiu pat bad ka rep ka riang, katba ka kam ka dang ïaid dei ban ailad pat ïa ka rep ka riang. Na ka liang ka Assam, haba don kino kino ki jingeh ha khappud, ngi shem ba ka ju pynjur bad pynkhlaiñ bha ïa ki bor pahara hynrei haba phai pat sha ka Meghalaya, ka Sorkar imat ka pynkhlaiñ bor pahara tad ynda la don ki jingjia kiba heh ne ka jingmih surok jong ki paidbah ban dawa. Hato kum ka Sorkar kam lah mo ban trei beit nalade, balei hap ban ap haduh da mih surok.
La ju sakhi beit haba la don ka jingeh kaba heh, ki bor Sorkar ki ju pynpaw beit ba ki la shimkhia bad buh hakhmat eh, hynrei balei pat kane ka kam, kam kut bad ka ïai bteng kumne man ka por. Haba shimkhia te dei ban weng syndon ïa ki jingeh ba kum ki nongrep kin ïoh ban rep ban riang hapdeng ka jingsuk bad ka jingkmen man la ki aiom rep, khlem da don jingtieng ne jingsyier.
