Ka jingpaw na ka kaiphod jong ka Performance Grading Index (PGI) 2.0 ba la pyllait da ka Ministry of Education, ka la buh ïa ka Meghalaya ha trai duh napdeng baroh ki Jylla, kata ban wan ha ka kyrdan kaba 36 na ki 36 tylli ki Jylla bad ruh ban dei tang maka, ka Jylla kaba ïoh ha ka Grade-10 ne ka grade kaba hapoh tam. Haba kumne, ïano yn kynnoh. Ka Meghalaya kaba la ju bna nam ha ki por bad ki snem kiba la leit kum kata ka Education Hub ha ka thaiñ Shatei Lam-Mihngi hynrei mynta kane ka nam ka la jah syndon hynrei ngi la ïohi ba ïa kane ka nam mynta la bujli bad knieh noh da kata ka nam kaba la ai, kata ka ‘Rock Capital of India’.
Katkum kane ka kaiphod kaba la pyllait, ka Meghalaya ka la kamai tang 417.9 point na ki 1000 point, kaba pynpaw ba ka rukom trei bad pynïaid kam ka long kaba sniew haduh katta katta jong ka Meghalaya, ha kaba wat ka Bihar kaba ju wan bha shadien ruh hynrei ka dang tam ïa ka Meghalaya. Watla ka Meghalaya ka don haduh 55160 ngut ki nonghikai bad 14582 tylli ki skul hynrei kawei na ki daw jong ka jinghiar bad wan ha trai duh ka dei ka jingjur palat jong ka jingdon ka jingpep skul shiteng por kaba kot shaduh ka 22 hajar ngut ha ka shisnem, ka jingbym don ka jingpynrung ïa ki khynnah ha ki 206 tylli ki skul bad kumjuh ruh ka jingpynrung tang iwei i khynnah ha ki 2269 tylli ki skul. Ka long kaba sngewma bad sngewsyier ban tip ba ha Meghalaya, ka don ka jingduna ha ka jingpynrung skul bad ka jingjyllei ha ka jingpep skul shiteng por jong ki khynnah. Kane kam long satia ka dak ka shin jong ka jingbha.
Ki jinglap ki long kiba sngew shyrkhei namar shisien la ñiew ïa ka Meghalaya kum ka pdeng jong ka pule puthi ha ka thaiñ Shatei Lam-Mihngi, mynta pat la ñiew ïa ka Jylla kum ka jaka pdeng jong ki tamasa bad ka put ka tem. Haba kumne, shano ka lawei jong ki khynnah bad samla pule. Ka PGI ka bishar bniah ïa ki Jylla halor ki jingmih na ka jingpule, ki jingtei, ka jinglong marryngkat, ka jingsynshar, ka jingpule digital, bad ka jinghikai nonghikai. Ka Jylla Meghalaya ka la sah tang kum ka Jylla kaba don ha ka kyrdan ba rit tam (“Akanshi-3”).
Ngi ju sakhi ba ha ki jingïalang kiba pher bapher na ka liang ki nongïalam ka Sorkar kata naduh u Myntri Rangbah ka Jylla haduh Myntri ka tnad pule puthi, ki ju pynpaw ba ki buh hakhmat ïa k pule dangle. Hato kane ka long bad paw tang ha ki jingkren khlem treikam satia pat ha madan. Lada dei ba ki buh hakhmat te kaei pat ka jingeh ba ka Meghalaya ka don ha trai duh. Hato dei namar bym don ki polisi treikam kiba biang, ka jingbym lah ban phai khmat sha ki bynta ba donkam namar kitei ki daw kumba la pynpaw kim dei satia kiba dang mih thymmai hynrei kiba la don la slem, te balei pat hap ban mad jingeh haduh mynta.
Ka jingpule ka dei ban long ka jingthmu ba shisha jong ka jingsynshar, ym tang ka jingïakren saiñ pyrthei. Ka donkam ïa ka jingpynkylla ba kyrkieh ha ka rukom ai jinghikai. Dei ban kyntiew ïa ki jingtei bad ki skul ba paka ha ki nongkyndong. Ki jingmih na ka jingpule ki dei ban kham kongsan ban ïa ka jingkheiñ jingdiah jong ka jingpynrung kyrteng. Ka Meghalaya ka donkam ïa ka jingbei tyngka kaba neh ha ki bun snem ban ïoh biang ïa ka nam barim jong ka, kum ka jaka pdeng jong ka pule puthi ha ka thaiñ Shatei Lam-Mihngi. Ki jingpynbeit kyrdan kim dei tang ki nombar; ki pynpaw ïa ka lawei ba jrong jong ki samla jong ka Meghalaya bad ka lynti ïaid jong ka roi ka par jong ka Jylla.
