Ka jingwan jong ki heh ki haiñ shapoh ka Jylla watla ka ju long ka jingkyrkhu bad ka burom na ka bynta ka Jylla hynrei ha kajuh ka por ka long ruh kum ka jingpynsaja bad pynsyrtok ïa ki paidbah. Man ba wan ki heh ki haiñ, ngi ju sakhi ba kiba hap ban mad ka jingeh bad syrtok dei beit ki paidbah. Watla kum kine ki jingjia kim dei shuh kiba dang thymmai hynrei kaba kum ki bor Sorkar bad ruh ki bor pynïaid district bad ki pulit ki la tip bha hynrei balei pat ym lah ban kham pynduna ïa ka jingeh jong ki paidbah. Hato ka por ka dei kaba kongsan tang jong ki heh ki haiñ, balei ka por kam long mo kaba kongsan na ka bynta u paidbah. Ïa kane ka jingjia, ngi la sakhi ha ka sngi Palei haba u Myntri ka tnad Kam Pohïing ka Ri u Amit Shah u la wan sha Shillong ban ïashim bynta bad pynïaid ïa ka jingïalang jong ka NEC. Ha kum kane ka por, ka la don ruh ka jingpyrkhing kaba jur bha ha ki surok kiba ki heh ki haiñ ki ïaid. Hynrei balei na ka liang ki bor pynïaid district bad ki pulit kim lah satia ban pynïaid ha ka rukom kaba biang bad ban kham pynduna ïa ka jingeh jong ki paidbah. Hooid, ngi sngewthuh ba donkam ban khang ïa ki surok ban ïaid ki heh ki haiñ khamtam lei ba ki surok jong ngi ki long kiba rit. Hynrei katkum ka jingpaw ka pyni ba ki bor pynïaid district ryngkat ki pulit kim shym la lah satia ban pynïaid ïa ka kam ha ka rukom kaba biang ne ban pynduna jingeh ïa ki paidbah. Balei hap ban khang lynti haduh shi kynta tam. Balei ban pynsyrtok ïa ki paidbah. Hooid lada ka dei tang 5 minit ba khang por ba ki poi ha kito ki bynta, ngi sngewthuh ba ki paidbah ruh kin nym sngew eiei hynrei ban shu ïeng sbak hapdeng surok da ki kynta bad hapdeng ka jingshit, mano bym bitar. Haba sakhi na ka rukom pynïaid kali jong ki pulit ha kane ka sngi, ka paw thik kumba ki kulmar jingmut bad imat tang la ïeng u Amit Shah na jaka ïeng, ki la pynsted ban khang noh ïa ka surok thik kumba u la mih na ka jingïalang. Ngi la ïoh ban sakhi ba ha ka thaiñ Mawroh, la khang ban rung kali ban hiar sha ka thaiñ Golflink da kaba ai daw ba la dei ka por ïaid jong u Amit Shah hynrei tang hadien katto katne por pat, la pyllait biang ban hiar. Te kane ka dei kaei, hato kam dei ka jingkulmar jingmut jong kiba pynïaid kali. Haba kita ki heh ki haiñ tang na ki jingïalang kim pat mih, balei ban khohreh bad pynsted ka khang surok. Ngi sakhi ruh ba kiba bun ki kmie ki kpa ki la pynpaw ka jingbitar haba leit shaw ïa la ki khun na ki skul kiba don ha ki lynti ïaid jong ki heh ki haiñ, ha kaba la khang ban ïaid kali bad bthah ban ïeng jngai bad phah leit da ka kjat. Kane kam dei ka sien banyngkong lane bakhatduh ba ki heh ki haiñ kin wan sha Meghalaya. Ha man ba wan ma ki, ma ngi ki paidbah ngi hap ban mad jingeh na ka jingpyrkhing ha ka jingïaid ki kali. Namar ka jingbuh hakhmat ïa ka jinglong shngaiñ jong kine ki kynrem ki lyndan, ki pulit ki hap ban pynjari da ki jingpyrkhing kiba bun jait haduh ban da mih syep sa ki paidbah kiba hap ban shong ha surok khlem khih shano-shano. Ngi sngewdei ban ai jingmut ïa kine ki heh ki haiñ ba kin pyndonkam beit da ka ‘Helicopter’ haba ki wan ban ïashim bynta ha ki jingïalang khlem da donkam ban pynwit ïa ki nongleit nongwan ha surok. Ka Sorkar Jylla ka dei ruh ban nang ban buh ïa ki jaka ban pynlong ïa ki jingïalang da kaba jied da ki jaka ba ki ‘Helicopter’ ki lah ban hiar bad kiew. Ka nuksa ka long kum ha madan Polo. Ki heh ki haiñ ki lah ban wan her na Upper Shillong ne Umroi da ka ‘Helicopter’, kin hiar ha madan Polo, ïashim bynta ha ka jingïalang bad ynda la kut kata, sa kiew biang da ka ‘Helicopter’ ban leit sha Upper Shillong ne Umroi bad nangto, sa sha kad liengsuiñ ha Guwahati. Hynrei lada pynlong jingïalang ha ki jaka ba ka ‘Helicopter’ kam don jaka ban hiar ne kiew, ma ngi ki paidbah ngin hap ban mad ïa ki jingeh. Hap ban pynwan dur bha ïa ki jingïalang haba ki wan ki kynrem ki lyndan. Ki bor pahara ruh ki dei ban sngewthuh ba ki paidbah kim don por ban ïeng ha surok da ki kynta. Kane ka dei ka pyrthei hiran bad ngi hap ban ïa beh sha ki kam ki jam kiba bun jait. Kam mut ba tang ba wan ki kynrem ki lyndan, ma ngi ki paidbah ngi hap ban mad jingeh. Kata ka long ka bym shong hok bad bym shong nongrim. Ki don ki lad, kumba la kdew haneng, ban pyllait ïa ngi ki paidbah na ka jingsyrtok ha surok. Tangba imat ka Sorkar Jylla ka kwah ban pyni ïa ka sor Shillong sha kine ki heh ki haiñ da kaba pynïaid ïa ki na surok. Ha kane ka juk stad mynta lei, ym da donkam ïa ki heh ki haiñ ba kin da wan da ka met. Ki lah ban shu shong na nongbah New Delhi ban plie bad ai jingkren ha ki jingïalang ba bun jait. Ha kane ka dur, baroh ki lait ban ïa bunkam bad na ka jingsyrtok. Ngi ïohi ba ha kiba bun ki jingïalang, u Myntri Rangbahduh u shu ai jingkren lyngba ki kor ki bor na New Delhi khlem da donkam ban leit sha kito ki jaka. Ngi kyntu ba dei ban shim da kane ka lad na ka bynta baroh khnang ba ki paidbah kin lait na ka jinglynga pisa bad ban ïada ruh na ka jingpynlut ksan ïa ka pisa paidbah.
