Ha ka sngi Nyngkong, ki nongdie madan kiba ju shong die jingdie ha shi lynter jong ka surok ban poi ha Vishal, ki la hap ban mih bad shong rah plakad harud jong ka surok hadien ba ka Shillong Municipal Board ka la bthah ba ki dei ban sangeh die jingdie ar sngi, namar ba ka don ka jingïalang jong ki heh Sorkar ha hotel Courtyard Marriot. Isynei ïa ki briew kiba duk ba suk kiba kamai jakpoh da kaba die jingdie harud surok ban pyndap ïa la ka ïing ka sem, naba tang don kino-kino ki prokram Sorkar, ki ju shah beh beit.
Ka jingkylli kaba mih hato katei ka jaka ba ka jingshong die jingdie ka jong ki ha shi lynter jong katei ka surok ka dei kaba beaiñ ne kumno, lada dei kaba long beaiñ bad pyrshah ïa ki kyndon, dei ban weng bad ban nym shah satia ba kin shong die hynrei lada dei ba ki lah ban shong ban die, te balei pat ban phah khang bad sangeh die. Kine ki briew ki im bad pyndap pynbiang ïa la ka jong ka ïing ka sem da kaba kamai na kine ki dukan ki jong ki bad lada dei tang namar ba wan ki heh ki haiñ ban phah sangeh ïa ka jingdie, te shano kin leit bad da ei kin aibam ïa la ki khun ki kti. Kam dei satia kaba suk ba kin lah ban pyndap ha ïing ha sem, lada khang tang shisngi ne wat shiteng sngi ruh. Kine ki dei ki briew kiba kamai mynsngi bad bam da miet. Lada la bthah ba ki hap ban sangeh plie dukan haduh ar sngi, katno kan ktah ïa ki. Balei kita ki bor ba dei peit kim lah ban pynkynriah noh sha kiwei ki jaka.
Hooid ka jingwan jong ki heh ki haiñ shapoh ka Jylla ka long shisha kaba donkam bad kaba plie lad ïa ka Jylla ha kiba bun ki liang khamtam ban kyntiew ïa ka roi ka par bad ruh wat ïa ka burom jong ka Jylla. Hynrei balei pat ban kyndang ïa ki nongdie madan, hato kum ka Sorkar ka kwah ban buhrieh ïa kine ne ba ka lehrain ba lada kita ki heh ki haiñ kin ïohi da la ki jong ki khmat ïa kine ki briew harud surok. Kum kine ki jingjia, ngi ju sakhi ruh ym tang ha kane ka kynti hynrei jan manla ka por. Ngi lah ban kynmaw ba ha ki snem kiba la leit, haba wan ki heh ki haiñ, la pynkylla dur ïa ki dukan tap plastik harud surok. Ka Sorkar ka la pynlut da ka pisa paidbah ban pynbha briew ïa kine ki jaka ba don ki nongshong die madan, ha kaba la ker da ki siej bad pynphuh pat da ki jaiñ.
Ka jingwan jong ki heh ki haiñ ym tang ba ka pynduh ïa ka kamai kajih jong kine ki briew kiba shongdie madan, hynrei kum kine ki jingwan ki ju pynsyrtok ruh shi katdei eh ïa ka leit ka wan jong ki paidbah. Kum ki heh ki haiñ kiba wan na Delhi kim tip ne bna eiei halor kane, hynrei ka jingsyrtok jong ki paidbah ka dei beit namar ka jingbym nang ban pynïaid ha ka rukom kaba dei jong ki bor ba dei khmih ka Jylla.
Ha kane ka juk stad mynta lei, ym da donkam ïa ki heh ki haiñ ba kin da wan da ka met. Ki lah ban shu shong na nongbah New Delhi ban plie bad ai jingkren ha ki jingïalang ba bun jait. Ha kane ka dur, baroh ki lait ban ïa bunkam bad na ka jingsyrtok. Ngi ïohi ba ha kiba bun ki jingïalang, u Myntri Rangbahduh u shu ai jingkren lyngba ki kor ki bor na New Delhi khlem da donkam ban leit sha kito ki jaka. Ngi kyntu ba dei ban shim da kane ka lad na ka bynta baroh khnang ba ki paidbah kin lait na ka jinglynga pisa bad ban ïada ruh na ka jingpynlut ksan ïa ka pisa paidbah.
