Ka jingjia ha ka surok Nongstoiñ By-pass kaba hap ha thanad Nongstoiñ ha ka 28 tarik Jylliew ha kaba kawei ka kynthei ka la shah thombor bad shah shoh ha uwei pat u briew ba la kynnoh ruh ba u dei u lok barim, kaba la wanrah ïa ka jingbitar bad jingpynrem jur na kiba bun. Ngim lah ban mutdur ba u shynrang un leh haduh katto-katto ïa ka kynthei ha kane ka juk. Watla ngi don ïa ka jingbitar katno-katno ruh hynrei ban shu shoh bad ktah kti kam long satia kaba dei bad ka aiñ ruh kam shah tdot ïa uno-uno ne kano-kano ka briew ban ktah kti ïa kiwei. Ha ka jingshisha, lada ka la leh ïa kano-kano ka jingbakla, la dei ban aiti sha ki pulit ne ban bishar ha kawei pat ka rukom bad ym shu leh ‘riewkhlaw kumto kaba la thad rong ïa ka shnong, ka thaiñ bad ka Jylla baroh kawei.
Hynrei kiba kum kitei ki jingjia kim dei satia ki bathymmai ne kiba lah ban ym jia shuh. Ngi kynmaw ba ha ki snem kiba mynshwa, ki longïing longsem ki la duh noh ïa la ki baieid bathoiñ ha ka jingshah bom shah tied ym tang ha ki riew shimet hynrei kumjuh ruh ha u paidbhur na ka daw ba la suba sniew bad shah kynnoh laiphew jait. Ka long shisha kaba i sang pap ban peit ïa kiba kum kine ki jingjia. Kin don kiba thap kti haba ki ïohi ïa kine ki jingjia, hynrei ngim tharai ba kin ïakmen bad risa lada ka wan jia ha ïing ha sem jong ki. Ngim dei ban pynshlur ïa kine ki kam namar ka lah ban wan jia ha ki ïing ki sem jong ngi ha kano-kano ka por namar ngim lah ban tip ïa ka jinglong jong ki briew mynta.
Katei ka jingjia ka wanrah ruh ïa ka jingkylli ba shano ka jah kata ka jingtip briew? Ynnai pat ïakren ïa kata ka jingtip Blei. Kiba dang tip briew kin ym shlan ban leh haduh katto-katto. Kiba la tip Blei kin ïaid da ka burom ka akor wat pyrshah ïa kito kiba la tip pylleiñ ba ki la leh ïa ki kam sniew. Ngi don ïa ki pulit kiba dei ki nongpyntreikam ïa ka aiñ, bad kiba tip briew bad tip Blei kin jin da la khot ïa ki pulit ban tohkit bad ym ban rai hi dalade. Kumba long mynta, ïa une u briew la leit ban aiti noh da ka VDPCNA bad VDP sha ki pulit ka Nongstoiñ, ha kaba ki pulit ruh namar bym don ba ujor ki la shim noh da ka sou-moto case ïa kane ka kam. Ha ka jingshisha la dei ban ïakren da ka ktien kaba shai bad ym ban ktah kti. Kam don hok hi ruh ban ktah kti wat lada dei mano-mano ruh.
Ngi kyntu ruh ïa ki nongshong shnong ba kim dei ban shu long tang ki nongpeit kai haba ki ïohi ïa kiba kum kitei ki jingjia. Ha kane ka juk, ha ka jaka ban ïarap ïa ki lanot, ki briew ki la sngewtynnad ban sei shwa da ka ‘Mobile Phone’ bad ring dur ïa ka jingngat ki lanot ha ka apot sepsngi. Hooid, teng-teng ki don ki jingjia ba yn hap ban ring dur namar kato ka dur kaba la ring kan long kum ka sabut hakhmat ka aiñ. Hynrei ym donkam ïa baroh ba kin ring. Yn hap ban mareh ban ai jingïarap ruh ïa ki lanot. Ka long ka jinglehnohei ïa ka jinglong briew lada ngi shu peit kai bad ieh ïa ki lanot ba kin ïa ksaid ban ring mynsiem. Ynnai ïa klet ïa ka jingdonkam ban ïarap iwei ïa iwei pat. Long kiba kloi ban mareh bad kner ïa ki kti na ka bynta ki lanot. Hynrei kaba kham jynjar tangba kaba ai jingmyntoi ka long ban klet noh ïa ka jingpeit kai bad ban mareh sha ki lanot bad ban ai ïa la ka kti kamon ka kti kadiang.
