Shillong, Naitung 02
Ha kaba ïadei bad ka jingpynmih khubor bapher-bapher ha kine ki sngi ha kaba ïadei bad ka kam Rangbah Shnong ha Pynursla, na ka liang ki nongïalam ka Raid Shabong Khyrim Syiemship, ki la mih ka jingpynshai haba ïadei bad kane ka bynta.
Ha ka kyrwoh ba la phah ki nongïalam ka Raid Shabong ki la ïathuh ba la pynlong nyngkong eh ïa ka jingjied Rangbah Shnong ha ka 14 Ïaïong 2026, ha kaba na ka liang ki Kur ki la pynmih 2 ngut ki rangbah ba la ibit da ka kur, kumba long ka riti bad dustur bad ki rai na ki ïingbishar jong u Syiem, District Council bad High Court, katba ïa u Bantei Thabah, la pynmih da ki paralok jong u.
Ki la ong, ba ka la mih ka jingpyrshah ïa u Bantei Thabah da u wei u Khongmawloh, ba la sakhi pynskhem bad pyrshah jur ruh da u pyrsa kur hi jong u Bantei Thabah, namar u ne um wan na ka Kur Khongmawloh (Shabong), hynrei u dei nabar ka Raid kata, na Shatwiat.
“Kumba la tip paidbah ba u Khongmawloh (Shatwiat) um ju don bynta ha ka kam synshar ha ka Raid hi baroh kawei. Te la pynsangeh ïa ka dorbar bad la pynlong biang pat ha ka 30 Ïaïong 2026,” la ong ki nongïalam ka Raid.
Shuh shuh ki la pyntip ba ha baroh ar ki dorbar, u kam beit ïalade ba u dei u trai. Hynrei u Proterm Chairman hadien ka jingpyrshah kaba jur, u la pynïaid jubor ïa ka Dorbar, kumba la sakhi da ki durkhih ha kato ka sngi.
“Kumta ban ong ba u Bantei Thabah um dei na ka kur ka long pyrshah ïa ka riti dustur bad pyrshah ruh ïa ki rai jong ki lai tylli ki ïingbishar bapher-bapher. Kitei ki khubor ki long kiba lamler. Ka jingjied Rangbah Shnong ha Pynursla, ka la ju long bad kan dangïaid lang katkum ki riti ki dustur bad ki rai na ki lai tylli ki ïing bishar, ha kaba na ka Khyrim Syiemship Act ka pynskhem bad ki neh bad ban ïai long kumba la ju leh na ki por sha ka por,” ki la bynrap.
Ki la kdew ruh ba ha ka jingujor ba la ujor sha u Syiem bad ba la ai rai jop ïa u Bantei Thabah, kadei ba u Syiem u ïohi ba kata ka khana kumba la tip paidbah ba kam don ha ka record jong ka Hima.
“Ban ong shuh shuh ba u Bantei Thabah u ïoh 578 vote bad uba pynïeng da ka kur u ïoh tang 60, ka long kaba la shu jler khlemakor bad bym don nongrim haei-haei namar ki kur ki pyrshah bad u Proterm Chairman u shu pynbna khlem ñiew. Kitei ki 60 ngut kidei kiba ki shim na ka signature ha ka ujor, kiba la soi kidei tang kiba leit ïakynduh, ba u Rangbah ba la pynmih da ka kur ha shuwa ba un leit sha Smit ha ka 30 Ïaïong 2026, ban ujor, kaba long tang da ki minit naduh ba mih na ka dorbar. Ha ka jingshisha hadien ba ki kur ki la mih kum ka jingpyrshah, ki paidbah kiba bun ki la ïa mih lang lut bad la sah sa tang khyndiat, kata kiba kyrshan ïa u Bantei Thabah,” la ong ki nongïalam ka Raid Shabong.
