Khliehriat, Risaw 25
Ka Khliehriat East YWSC bad Rymbai Synrangshahkhain SC kila buh jaka ïalade sha ka semi final jong ka lympung ïalehkai 1st Division Football League-Thomas Nongtdu Memorial Trophy ba la pynïaid da ka East Jaintia Hills District Football Association (EJHDFA).
Kane kala wan hadien ba kine ki ar kynhun kila khur jingjop lyngba ka jingïashut penalty ha ka jingïalehkai quarter final kaba la long ha madan artificial turf Diengshynrum, Khliehriat haka 24 tarik Risaw.
Ha ka jingïalehkai quarter kaba nyngkong ka jingïakhun kala kut da 2-2 kol hapdeng ka Khliehriat East YWSC bad Rymbai Iawpynsing SC.
Hynrei hadien bala rah beit beit ïa ka jingïalehkai sha ka jingïashut penalty, ka Khliehriat East YWSC kala jop da 3-2 kol.
Ïa ki kol na bynta ka Khliehriat East YWSC la thep da u Roikhihbha Nongtdu (31) lyngba ka penalty bad (62). Katba ïa ki kol ka Rymbai Iawpynsing la thep da u Emaroy Dkhar (71) bad Mebankyrkhu Dkhar (80).
Ha ka jingïalehkai kaba bud, ka jingïakhun kala kut khlem da lah ban pynkhih jar hapdeng ka Rymbai Synrangshahkhain bad Lumshnong YWSC dei hadien ba ki nongpynïaid kila rah ïa ka jingïalehkai sha ka jingïashut penalty ka Rymbai Synrangshahkhain SC kala jop da 4-3 kol.
