Shillong, Naitung 02
U Bah Seiborlang War-bah, u MDC na Mawkyn -rew Konstitwensi, uba dei ruh u Executive Member (EM) ka Khasi Hills Autonomous Dis-trict Council (KHADC), u la ïathuh ba mynshwa ki briew ki ïa ong “Ka Mawkynrew kadei ka Konstitwensi kaba suk bha ban jop ilekshon, namar da shu thied da ka pisa ka la long, hynrei mynta ka la kylla shibun, namar ki paidbah ka thaiñ ki la sngewthuh”.
“Ka jingwan ka ilekshon MP ha ka por jong u (L) Dr Ricky AJ Syngkon, ka jingsngew-thuh ha ki briew ka la rung bad lada ym dei ka jingpynsngewthuh ne ka jingpruid dak ka VPP, ngam ïoh jingjop ha ka ilekshon MDC,” la ong u Bah Seiborlang haba kren sha ki lad pathai khubor ha ka sngi Palei jong ka taïew.
U la ong ba la ong ba um artatien ba ha kane ka ilekshon MP shiteng samoi ban sa wan ruh, ka Mawkynrew kan ai ïa ka risol kaba bha, namar ba ki paidbah ki la kwah ban ïohi shisha ïa ka jingkylla hapoh ka jingïalam ka VPP.
“Nga pynshisha shuh -shuh ba lada ki paidbah kiba ieid jong ngi kim sngewthuh ïa kata ka nongrim jong ki, kumba la pruid dak da ka VPP, ngan nym ïoh ïa ka vote bad ngan nym jop hi ruh ha kane ka ilekshon ba dangshu dep,” la ong u Bah Seiborlang.
Kumta u ong “Nga sngew ban ai burom nyngkong ïa U Blei, ba-ar sha ka party kaba ai ka nongrim kaba ki paidbah ka Mawkynrew kin sngewthuh bad kaba lai kadei sha ki paidbah ka Mawkynrew Konstitwensi hi baroh kawei kiba la sngewthuh. Baroh shi katta ki paidbah ki jied da ka pisa hynrei mynta ki la jied da ka nongrim”.
Haba ïadei bad kane ka ilekshon MP kaba mynta, ba ka party ka dangïaid shakhmat ban pynkhreh, u Bah Seiborlang u la pyntip ba na ka liang ki paidbah ki ïa ong, ba lada ki nongmihkhmat kim wan ban ïakynduh ruh, na ka liang jong ki, ki la sngewthuh bad tip ïa ka kamram ban leh. Namar kane ka thong kam dei tang mynta hynrei kadei haduh u snem 2028.
“Ngam artatien ruh, ba ha kane ka ilekshon shiteng samoi ba mynta, ka Mawkynrew kan ïoh ïa ka risol kaba bha, namar ki paidbah ka thaiñ ki la kwah shisha ïa ka jingkylla,” la bynrap u Bah Seiborlang.
