Tel Aviv, Risaw:
U Myntri Rangbahduh ka Israel, u Benjamin Netanyahu, ha kane ka kynti u la pynpaw ba ka Israel ka ngeit ba ka Israel kan sa iakynduh jingeh ïa ka jingsynshar jong ka US ha ki por ban wan, kaba lah ban buh jingma ïa ka jingiarap shipai bad ka jingiadei hapdeng ka Israel bad ka US. Haba kren ha ka jingïalang katto katne sngi shuwa ka ilekshon Israel ka ban long ha ka 27 tarik u Risaw, u PM ka Israel u la ong ba ka ri ka dei ban thaw ïa ki jingïatehlok ba thymmai bad ki ri pyrthei, kynthup bad ki Ri India bad ki ri Latin America, na ka bynta ban pynkhlaiñ ïa ka kyrdan jong ka ri jong u.
Kane ka jingkren jong u Netanyahu ka long tang hadien katto- katne kynta shwa ba un ïoh ïa ka jingkyrshan kaba tyngeh na u President ka US Donald Trump, uba la pynpaw paidbah ïa ka jingkyrshan jong u ïa ka jingïakhun ban jied biang ïa u PM Israel tang katto katne sngi shuwa ba ka ri kan leit sha ka ilekshon.
“Hapoh ar snem, u president, shynrang ne kynthei, u lah ban wan ha ka bor uba pyrshah jur ïa ka Israel. Kumno phin leh ïa kata? Kumno phin treikam ha kaba iadei bad ka ri America? Bad hadien kata, kiei ki lad ki lynti kiba donkam?” U Netanyahu u la kylli.
U myntri rangbah u la ban jur ba ka Tel Aviv ka dei ban pyndonkam ïa ki snem kiba dang sah jong ka jinglong president jong u Trump ban pynskhem ïa ka kyrdan jong ka katba ka dang pynkhreh ïa ka jingkylla kaba lah ban jia ha ka polisi jong ka America.
“Nyngkong eh, ngi dei ban leh ïa kaba donkam baroh ha kine ki ar snem, bad ha ki ar snem ban wan, ha ka madan jong ka America, lyngba ki por kiba bha bad kiba sniew,” u la ong.
“Ka kam kaba ar ka long ban thaw ïa kiwei pat ki jingïateh lok. Dei kata kaba nga dang trei mynta bad kiba bun ki ri ha ka thaiñ jong ngi bad shabar jong ka. Ka India kam dei ka ri kaba rit, bad ki don bun kiwei pat,” la ong u myntri rangbah duh jong ka Israel, da kaba kdew sha ki jingjia ha ka saiñ hima sima ha Latin America kum kawei pat ka lad ban pyniar ïa ka network jong ki paralok jong ka Israel.
“Ka don ka jingkylla kaba khraw ha Latin America, bad ka lah ban don ka jingkylla kaba khraw ha Brazil tang ha ki khyndiat sngi,” la kdew u Netanyahu, bad bynrap, “Ngi dei ban pyniar ïa ka kynhun jong ki jingïatreilang jong ngi bad ban pynroi ïa ki jinglah kiba pynlong ïa ngi kiba kordor ïa baroh.”
Kane kam dei ka sien kaba nyngkong ba u Netanyahu u la pynkynmaw ïa ka India bad ïa ka jingïadei jong u bad u Myntri Rangbahduh ka ri u Narendra Modi ban ïasaid pyrshah ïa ka jinglong kyrpang jong ka Israel kaba nangroi ha ka pyrthei bad ban pyni ïa ka jingjop jong ka sorkar jong u ha ka kam khaïi pateng.
