Shillong, Naitung 02
Kum shi bynta ban ïadon bynta lang ha ka jingpynlait paidbah ïa ka Viksit Bharat-Guarantee for Rozgar and Ajeevika Mission-Gramin (VB-G RAM G) Act 2025 ka State Rural Employment Society ka la pynlong ïa ka State Level Jan Samelan-cum prokram ha MEMATI kaba la pynlong ha ka jingïadon lang ki nongtrei Village Employment Committee (VEC) bad ki District Officer jong ka tnad.
Ka State Rural Employment Society ka dei kaba hap hapoh ka Community and Rural Development kaba ju peit bad pynïaid ïa ka skhim Mahatma Gandhi National Rural Employment Guarantee Act (MGNREGA) ïa kaba la tip mynta kum ka VB-G RAM G.
Haba ïoh ban ïakren ïa ka Kong Ïaraphun Diengdoh kaba dei ka Joint Mission Director ka State Rural Employment Society ka la ong ba ka Sorkar lyngba ka Cabinet ka la dep ban pdiang bad ka la sdang ban pyntreikam ïa kane ka skhim naduh ka 1 tarik u Naitung 2026.
Shuh-shuh ka la ïathuh ba ïa ka jingpyntreikam la pynneh ïa ki VEC ba kin long ki nongpyntreikam ha ki shnong ki thaw bad ïa ka State Scheme kaba la tip kum ka Viskit Bharat Guarantee for Rural Employment and Livelihoods Mission Scheme Meghalaya 2026. Kane ka Skhim ka ai bor ïa ki shnong ki thaw ba kin long ki nongpyntrei bad ki don katto katne ki jingkylla ha ka rukom pyntrei.
Ka la ïathuh ruh ba lyngba kane ka jingpynthymmai ïa kane ka skhim ka la don ruh ka jingmyntoi ïa ki paidbah ha kaba mynshuwa ki ïoh 100 sngi ban trei, katba lyngba kane VB-G RAM G kin ïoh ban trei 125 sngi, nalor kata ka dor bainong bylla ruh la kyntiew na ka 272 tyngka shisngi sha ka dor 300 tyngka shisngi naduh ka 1 tarik u Naitung 2026.
Ka Kong Ïaraphun ka la kdew ba mynshuwa ki don tang kumba 262 jait ki rukom ba lah ban pyntrei, hynrei mynta la pynrung haduh 318 tylli ki rukom ba lah ban pyntrei ba kynthup ïa ka jingpyntrei ïa ki ïingskul, ki Aganwadi Centre, ki ïing VEC, ban pynbha ïa ka ïoh ka kot, ban ïarap ïa ki SHG bad ban peit ban ïada na ka jingkylla ka suiñbneng.
Ka la bynrap ruh ba nalor kiba la kynthup ha kane ka Skhim ka Sorkar Pdeng ka dang pan jingmut ba lada dang don kiba dei ban kynthup ka lah ban dang pynrung shuh-shuh ha kine ki sngi ki por ban wan.
