Shillong, Naitung 02
Ka Hynñiewtrep Youths’ Council (HYC) ka pynrem jur ïa ka jubab jong u Myntri ba khmih ïa ka koit ka khiah ka Jylla, u Wailadmiki Shylla, halor ka jingjaboh ka lyer kaba la nang jur ha Byrnihat.
Ha ka kyrwoh ba la phah da u Bah Roy Kupar Synrem, President ka HYC, u la ong ba ha ka por ba ka thaiñ Byrnihat ka la shah kdew bunsien kum kawei na ki jaka ba la shah ktah jur na ka jingjaboh ka lyer, kaba mih na ki karkhana, ka jingong jong u Myntri ba ym pat ïoh pdiang kano-kano ka jingujor ba thoh sha ka Sorkar halor kane ka bynta, ka pyni shai ïa ka jingbym shimkhia jong ka Sorkar ïa kane ka mat, kaba ktah beit ïa ka jingim bad ka koit ka khiah jong ki paidbah.
“Ka jingjaboh ha Byrnihat kam dei satia ka mat kaba thymmai. La bun snem mynta, ki paidbah nongshong shnong ka thaiñ ki la mad ïa ka lyer jaboh, ka tdem na ki karkhana bad ka jingjulor jong ka mariang, kaba mih na ka jingtreikam jong ki karkhana bapher-bapher ha katei ka thaiñ, kynthup ïa ka karkhana shna ethanol,” u la ong.
Kumta, ka long kaba ym lah satia ban pdiang, ba ka Sorkar Jylla kan leh kumba kam tip ne kam pat sngewthuh ïa ka jingjur bad jingktah jong kane ka jingeh.
Ka HYC ka shem, ba ka long kaba sngewkhia shisha ba ka tnad ka koit ka khiah kan shu ap haduh ba yn da phah da ka jingujor jingthoh shuwa ban leh ei-ei halor kane ka jingeh, kaba la paw paidbah.
Haba ka jingjaboh ha Byrnihat ka la long ka mat jingïakren paidbah bad kaba la mih bunsien ha ki lad pathai khubor, ka kamram jong ka Sorkar kam dei ban shu ai daw hynrei ban shimkhia mardor, da kaba leh ïa ka jingwad bniah halor ka jingktah ha ka koit ka khiah jong ki paidbah bad ban pynshitom ïa ki karkhana kiba donkti ban pynjaboh ïa ka mariang, la ong u Bah Roy Kupar Synrem ha ka kyrwoh ba la phah.
Namarkata, u ong ba ka HYC ka dawa ïa ka Sorkar Meghalaya, ba kan tuklar mardor ïa kane ka kam bad ban shim da ki sienjam kiba tyngeh pyrshah ïa kino kino ki karkhana kiba pynkheiñ ïa ki kyndon ïada mariang bad kiba buh jingma ïa ka jingim bad jingkoit jingkhiah jong ki paidbah.
Ki Paidbah ka Byrnihat bad ki shnong ba marjan ki don hok ban ïoh ïa ka lyer kaba khuid bad ka jingïada kaba pura na ka bynta ka koit ka khiah jong ki, da kaba bynrap ruh ba lada ka Sorkar Jylla, ka dang bteng ban sngap mynthi bad nym leh ei-ei ïa kane ka mat kaba ktah ïa ki paidbah, ka HYC kan ym banse ban leh ei-ei, ban dawa ïa ka hok pyrshah ïa ka Sorkar bad ïa ki karkhana kiba don bynta ha kane ka jingpynjaboh kaba la buh jingma ïa ka mariang bad ïa ka koit ka khiah jong ki paidbah.
