Khliehriat, Naitung 03
Ïa ka met jong u Bah Kyrshan Lamurong (34 snem ka rta), la ïoh ban sei na kawei ka thliew dewïong kaba la shu iehnoh ha Ladrymbai, East Jaiñtia Hills ha ka janmiet 3 tarik Naitung hadien ka jingïatreilang jong ki pulit ka Search & Rescue Team (SRT) bad ki pulit jong ka East Jaiñtia Hills.
Halor kane, ki pulit ki la kem noh ïa 3 ngut ki briew kiba suba donkti ha ka jingpynïap bad tuh ïa ka kali ba dang shu thied thymmai jong une u briew.
Kine kiba la shah kem la tip kyrteng kum u Kumar Bermam (44 snem) na Kokrajhar District, u Joysharon Bermam (30 snem) na Chirang District ha Assam, bad u Bah Tensing Dkhar (34 snem) na Moolait Sumer.
Katkum ka jingïathuh jong ki pulit, la ong ba u Bah Kyrshan Lamurong uba sah ha Tongseng-Nongkhlieh u la jah rngai naduh ka miet jong ka 15 tarik Jylliew bad ki bahaïing jong u ki la ujor ejahar ha Khliehriat Police Station ha ka 16 tarik Jylliew hadien ba um shym la lah ban wan phai ïing ryngkat bad ka kali Maruti Suzuki S-Presso kaba u dang shu thied thymmai.
U Superintendent of Police ka East Jaiñtia Hills, u Shailendra Bamaniya u la ïathuh ba ha ka jingtohkit ki pulit ki la ïoh ban kem ïa ki 3 ngut ki briew kiba la tip kyrteng kum u Kumar Bermam (44 snem) na Kokrajhar district, u Joysharon Bermam (30 snem) na Chirang district ha Assam, bad u Bah Tensing Dkhar (34 snem) na Moolait Sumer.
U la pyntip ba ïa u Kumar Bermam bad ïa u Joysharon Bermam la kem na Umpleng, katba ïa u Bah Tensing Dkhar pat la kem na kawei ka jaka kaba don khlaw ha Lumshnong ha ka por ba ki pulit ki pynlong ka jingkhynra ha ka por mynstep.
Haba bteng shuh-shuh ïa ka jingtohkit, kitei ki lai ngut ki la kam ba ki la pynïap ïa u Bah Kyrshan Lamurong bad ki la ïalam ïa ki pulit sha ka jaka ba jia ka jingjia bad ba ki la phla ruh ha ki pulit ba ïa ka met la bret hapoh kawei ka thliew dewïong kaba la iehnoh ha Ladrymbai.
Mar-mar ki pulit ki la pyntip sha ka Crime Scene Unit bad la khot ïa ka jingïarap lem jong ka kynhun SRT bad la lah sei ïa ka met na katei ka thliew kaba la dap da ka um haduh ka por janmiet.
Shuh shuh ka jingtohkit ka lap ba ka kali S-Presso kaba dang shu thied thymmai la rah noh hadien ba la leh ïa katei ka kam runar.
Hadien, la lapdien ïa katei ka kali sha kawei ka jaka kaba hap hapoh Mawkyrwat, South West Khasi Hills District, bad ba ki pulit kin leit shimti noh lashai ka Sngi Saitjaiñ.
Ïa ka ‘Post Mortem’ la pyndep hajan ka jaka ba lap ïa ka metïap shuwa ban aiti sha ki bahaïing hadien ba la pyndep ïaki jingdonkam katkum ka aiñ.
