Ha kine ki khyndiat sngi, la sakhi ba ki la don bun ki jingjia ïatyngkhuh kali ha kylleng ki bynta jong ka nongbah Shillong bad kumjuh ruh sha kiwei ki bynta jong ka Jylla. Ym tang ba ïatyngkhuh kali hynrei ha kine ki jingjia, ki la don ruh bun tylli ki mynsiem briew kiba la duh ei. Kum kine ki jingjia, ngi sakhi ba ki dei kiba jia beit ha ka por da la kem dum ka bneng ne mynmiet. Ngim lah ban tip ne sngewthuh ba kaei ka daw jong ka jingïatyngkhuh kali, hato dei na ka jingïapynher sted bad shoh khawiang ne kiei pat ki daw. Kum ki nongñiah kali arshaka ne saw shaka, dei ban long kiba husiar bad phikir bha ha ka por ba ñiah kali khamtam lei ha ka por mynmiet. Ym dei ban shu ïa pynher ne ñiah kali hapdeng ka jingshoh khawiang namar ka buh jingma pat ïa kiwei kiba ïaid lang ha surok syngkien.
Haba phai tang ha nongbah Shillong, lah ban ïohi ba ka rukom ñiah kali khamtam ha ka por mynmiet, ka long shisha kaba buh jingma ïa kiwei. Ha ka por mynmiet, imat kam don shuh kata ka jingpyrkhat lem ïa kiwei bad ba la shim beit ba ka surok ka dei beit thik tang ka jong ki. La shu ïa ïeng kat haba lap ba shem, khlem da pyrkhat shuh ïa kiwei bad khamtam lei ka jingrung jong ki kali arshaka ne saw shaka na ki surok kiba la khang ne buh ‘No Entry’. Haba phai lei ha ki bynta jong ka Khyndailad, la i thik kum ka ïew luri lura, ym ithuh ithaw shuh, kata ka jingrung jingmih ki kali, kiba rung bad mih kat naba ki sngew mon. Na ka liang jong ka tnad pulit ruh ki la sdang ban pynlong ïa ka jingkhynra bad talasi ïa ki kali bad ha kaba la pynshitom ïa kiba pynkheiñ ïa ki kyndon ñiah kali. Hynrei kane ka jingkhynra bad talasi kam shym la long ha baroh ki bynta hynrei tang ha ki katto katne ki bynta bad kaba la leh ruh tang shisien shi taïew. Ka jingtalasi bad khynra ka dei ban long bha ha ki bynta jong ka Khyndailad, Polo kiba dei ki jaka kiba ka jingïalum briew bad jingbun ki kali ka jur bha.
Ngi sngewthuh ruh ba tang na ka liang ka tnad Pulit kan nym lah satia ban tehlakam ïa kum kine ki jingjia. Donkam ruh ïa ki shnong ki thaw bad khamtam lei ba kum ki nongñiah kali ruh kin shim lang ka jingkitkhlieh ban peit bad burom lem markylliang haba ñiah kali. Ngim donkam ban pynbud ïa ka ‘fast and furious’ ne leh ‘stunt’ ha ki surok syngkien. Kane ka jingleh kan buh jingma ïa kiwei pat. Katba ym pat ngat halade, imat kiba bun ki sngew beit ba ka biang beit lada ñiah ha kano-kano ka dur ruh, hynrei kam long kumta, ka kam kali ka long beit kaba donkam ban husiar bad phikir.
Halor kum kine ki jingjia kiba la shim noh ruh ïa kiba bun tylli ki mynsiem briew, ngi ïohi ruh ba na ka liang ka Sorkar Jylla haba pynpaw ka jingsngewkhia, ka la bthah ïa ki Deputy Commissioner bad Superintendent of Police ba kin pynkhlaiñ ïa ki jingtreikam ban tehlakam ïa ka jingñiah kali khlemakor bad ban leh da kaba tyngeh lada lap ïa kiba ñiah kali khlem akor. Ka long shisha kaba donkam haduh katta-katta kum kane ka jingbthah bad ba dei ban leh shisha da kaba tyngeh. Ka kali ka lah ban nym da dei eh kaba kordor hynrei ka mynsiem briew ka long kaba kordor shisha bad tang kito kiba ngat ha kane ka apot ki sngewthuh ïa kata ka jingduh, kaba ym lah shuh ban bujli. Long kiba husiar bad to da ïa burom lem mar kylliang ha ki surok syngkien.
