Shillong, Nailur 01
Ka Hynñiewtrep Integrated Territorial Organisation (HITO), ha ka janmiet jong ka 01 tarik u Nailur, 2026, ka la leit ban kynduh ïa u O.P Upadhya, Inspector General ka Border Security Force (BSF), Meghalaya Frontier, ban ïakren halor ki mat kiba ktah ïa ka Jylla.
Haba kren sha ki lad pathai khubor hadien ka jingwan ïakynduh, u Bah Donbok Dkhar, u la banjur ba ka jingïaibteng ban rung laitlan ki Bangladeshi sha kane ka Jylla, ka la long kawei na ki mat kaba la ktah bha ïa ka imlang sahlang, ha kaba na ka liang u IG, u la pan jingmut na ka seng halor kane ka bynta.
U Bah Donbok u la ong, ba dei ban thungkam ïa ki trai ri trai muluk ha katei ka kam, khnang ba kin lah ban tehlakam ïa ka jingrung laitlan ki Bangladeshi sha kane ka Jylla.
Nalorkata, u la maham ruh ïa kiba pynrung ïa ki Bangladeshi sha kane ka Jylla, ba lada ka seng ka lap nangne shakhmat, kan ym kren shuh hynrei kan ai beit da ka kti.
“Ngi la pynsngew ruh ha u IG, haba ïadei bad ban pynbun ïa ki kam BSF na bynta ki samla ka Jylla ha kaba na ka liang u IG u la kular ban shimkhia halor kane ka mat,” la ong u Bah Donbok.
U Bah Donbok u la ong ruh ba ka jingïakynduh bad u IG, ka long kaba seisoh, ha kaba u la pynthikna ba un sa shimkhia ïa kine ki mat ba rah ka seng.
