Graubunden, Nailur:
Ha kane ka jingjia kaba la jia hapoh ka nongbah Groubunden jong ka ri Switzerland, la ong ba kawei ka bos ri kaba kit ïa ki nongwan jngohkai pyrthei kiba dei ki nong Dutch ha ka dong mihngi jong ka Switzerland, ka la kylla kongpong, ha kaba bun ngut ki la duh ei noh ïa la ka jingim bad katto- katne ngut ruh kiba la mynsaw ha katei ka jingjia.
Kane ka jingjia, ka la jia hapdeng ki Commune jong ka Susch bad ka Zernez, kaba don ha ka Canton kaba don shatei lam mihngi jong ka Graubunden.
Ka Dutch Federation of Travel Agencies (ANVR), ka iathuh ha ka AFP, ba katei ka coach, ka dei jong ka kompeni jngohkai pyrthei, ka Oad bad ka kit ïa 48ngut ki nongleit jingleit, bad kitei baroh ki dei na Netherlands.
“Katto katne ngut ki briew ki la ïap ha ka jingjia ba sniewbok ha Susch. Katto katne ngut kiwei pat ki la mynsaw ruh,” la ong ki pulit jong ka Cantonal ha ka X, khlem da ai jingtip bniah halor ka jinglong jingman jong katei ka jingjia aksiden ne ïa ka jinglong jong ki nongshah pynïap.
U nongaiktien jong ki pulit, u la iathuh ha ka AFP, ba katei ka kynhun, kam kwah ban ai ïa ka jingkhein kaba kham bniah, tad haduh ban da pyntip sha ki bahaiing jong kiba iap.
Katkum ka ANVR, une u coach u la mih na Netherlands ha ka sngi Nyngkong bad u dang don ha ka jingleit jngoh shisngi sha Switzerland na Austria ha ka por ba katei ka jingjia ka la jia.
Ki dur ba la pynmih da ki lad pathai khubor jong ka Switzerland, ki pyni ba bun ki nongpyllait im, ki la mareh kylleng sawdong jong katei ka kali, kaba la kylla sha ka liang jong ka, kaba don shapoh surok, bad ki liengsuiñ, kiba la ieng hajan katei ka kali.
Ka Zernez ka dei ka jaka rung jong ki nongwan jngohkai sha ka jaka ri lum jong ka Switzerland, ka jaka ri lum Alpine kaba heh bha kaba heh palat 100 kilomitar square (40 mail square) ha kylleng ka them lum Engadine.
