Venezuela, Nailur:
Katkum ki khubor, la ong ba ka ‘First Lady’ barim jong ka Venezuela, ka la wad lad kumno ban ioh lait noh na patok, katba ma ka bad u tnga jongka, ki dang ap ïa ka jingbishar halor ka jingshah kynnoh khaii drok ha US.
Ka Cilia Flores, ka jong u President barim ka Venezuela, u Nicolás Maduro, “ka dei hok ban ïoh ïa ka lad ban ap ïa ka jingbishar jong ka, katba ka dang don ha ka jingshah set ha ïing” katba ka dang ïakynduh ïa ka jingpang dohnud, kaba la nang kham sniew naduh ba ka don ha phatok, la thoh ki nongïasaid aiñ jong ka, ha ki kot ki sla jong ka ïingbishar, kiba la aiti ha ka sngi thohdieng.
Ki nongïasaid aiñ, u Mark Donnelly bad u Andres Sanchez, ki la kyrpad ïa u nongbishar, ba un ailad ïa ka, ba kan mih noh na kawei ka patok jong ka Brooklyn, sha kawei ka ïing, kaba don hapoh jong ka Manhattan federal court district, ha kaba ma ka bad u Maduro, ki dei ban shah bishar ha u bnai Jymmang ban wan.
Hangta, ki nongiasaid ain ki la ong ba kan don hapoh ka jingpeitngor kaba 24 kynta shisngi bad yn shah tang ban peit ïa ki nongwan jngohkai kiba la mynjur da ka iingbishar bad ki nongmudui jong ka sorkar pdeng. Yn buddien ïa katei ka iing da ka video bad yn shim ïa ki jingkhot jong ka, la ong ki nongiasaid ain.
Ki nongmudui jong ka sorkar pdeng kim pat ai jubab. U nongaiktien jong ka ophis jong u nongiasaid ain jong ka US ha Manhattan u la kyntait ban kren eiei. U nongbishar, u Alvin K. Hellerstein, um pat lah ban ai ïa ka rai halor ka jingkyrpad jong u Flores.
Ka Flores, 69 snem ka rta bad u Maduro, 63 snem ka rta, ki la shah set ha kawei ka phatok ha Brooklyn, naduh ba ki shipai jong ka US, ki la kurup ïa ki, na ka ïing jong ki, kaba don ha Caracas, ha ka jingkhynra kaba shiteng synñia ha kaba sdang jong u bnai Jymmang bad la wanrah ïa ki sha New York City.
Baroh arngut ki la kam ba kim donkti ha ki jingshah kynnoh ba ki dei shi bynta jong ka jingthmu ban phah ïa u drok cocain shapoh US Ha ka jingthoh ba kyrpang ha ka ïingbishar, dang shen ki la pan ba dei ban weng noh ïa ka jingshah kynnoh jong ki halor ka nongrim ba ki don ka jinglaitluid kum ki nongïalam bad ka kynthei ba nyngkong jong ka ri nongwei.
Ki nongïasaid aiñ jong ka Flores, ki la ïathuh ba ka la im da ki snem bad ka jingpang mitral valve prolapse hynrei kam shym la ïoh satia ïa ka injek kaba man la u bnai kaba ka donkam ban pynïaid ïa kane ka jingpang naduh ba la kem ïa ka bad hadien la set phatok ïa ka ha Metropolitan Detention Centre ha Brooklyn.
