Kremlin, Nailur:
U President Vladimir Putin, ha ka Sngi Thohdieng, u la maham ba kano- kano ka jingphah ne jingpynrung ïa ki shipai Europe sha Ukraine, kan long “ka thma pyrshah ïa ka Russia” bad u la ong ba ka Russia kam shym la buh jingma iano- iano ruh.
“Ha kane ka khyllipmat, ki ong ba ki dang pyrkhat kumno ban phah ïa ki shipai shapoh u pud- u sam jong ka Ukraine. Kata ka mut ka thma pyrshah ïa ka Russia,” ki lad pathai khubor jong ka Russia, ki la sot ïa ka jingkren jong u, haba kdew sha ki nongïalam jong ka Europe.
“Ngim byrngem bad ngim don jingthmu ban byrngem ïa ki ri Europe. Balei ngin leh kumta? Ym don mano- mano ruh ba sngewthuh ba ngim don daw ban thaw jingiakynad ne ka thma pyrshah bad ka Europe,” u la ong.
U la ong ba ki nongialam jong ka Europe ki shu pyntieng- pynsyier ïa ki paidbah nongshong shnong jongki da ka jingma kaba shu mutdur kaba wan na ka Russia”.
“Kane ka jingma kam shym la don satia bad kam pat ju don hi ruh,” u la bynrap.
Ka Russia ka la sdang ïa ka jingleit hiar thma kaba jur pyrshah ïa ka Ukraine ha u Rymphang jong u snem 2022 bad ka la ong bunsien ba ka jingpynpoi ïa ki shipai jong ka Ri Sepngi ha ki jaka jong ka Ukraine ka dei ka lain rong saw kaba ym dei ban ïaid lait.
Kum kane ka jingpynkynriah kam la ju iakren da ki nongialam jong ka Europe la katto katne snem hynrei kam shym la urlong satia.
Ka Russia ka pynksan ïa ka jinghiar thma jong ka ïa ka Ukraine da kaba kdew ïa kaei kaba la ong ba ka dei ka jingma kaba mih na ka jingpynheh jong ka NATO sha ki khappud jong ka, ka kynhun shipai jong ka ri Sepngi kaba ka Kyiv ka angnud ban ïasoh lang.
