Beirut, Nailur:
Ka tnat shipai jong ka Israel ka la pynbna ba ka la ioh ban ther pynjulor ïa ki jingtei ba kyrpang jong ka kynhun lehnoh Hezbollah ha ki thaiñ ri lum Ali al-Taher ha ki bynta ba Shatei jong ka Lebanon ha kaba ka long ka jingshah pynjot kaba jur ïa ka kynhun lehnoh Shiite ba la kyrshan da ka Iran. U Myntri Rangbah duh jong ka Israel, u Benjamin Netanyahu bad U Israel Katz, u Myntri kam poh-ïing ka ri, ki la ong ba kane ka kam ka la pyndep ïa ka jingpynskhem ïa kawei ka jaka pahara ha katei ka jaka, da kaba shim ïa ka jingsynshar ha pura ha katei ka bynta.
Haba batai bniah ïa kane ka jingtreikam ha ka social media handle jong ka, ka Israel Defense Forces (IDF) ka la ong ba ïa kane ka labyrinth, kaba la tei ha ki arphew snem lyngba ka jingbei tyngka bad jingthmu jong ka Tehran, la pynjrong palat ïa ka 2 km (1.24 mail) bad ka don da ki phew tylli ki roket, ki namding, bad ki drone, kumjuh ruh ki tiar pynbthei.
“Ki shipai ki la lap ruh ïa ka jaka synshar pdeng jong ka ‘Badr’ Unit ba pawnam jong ka Hezbollah, kaba don ki jaka synshar, ki jaka buh tiar, bad ki jaka sah ba la tei ban pynneh pynsah ïa ki lehnoh hapoh khyndew na ka bynta ka jingïalehkai kaba slem,” la kdew ka post jong ka IDF.
Hadien kata, ha ka jingpynbna lang, u PM Netanyahu bad u myntri kam pohiing u Katz ruh ki la pynthikna ïa kane ka jingpynpra.
“Kane ka dei ka jingtei ba kongsan jong ki kam lehnoh ba la shna khnang ban long kum ka jaka pynlong ïa ka jingjop jong ka Galilaia, ryngkat ka jingpeit bniah bad ka jingsynshar ding halor ka Metula bad ka Kiryat Shmona,” ong ka kyrwoh ba ïatreilang.
Da kaba pynskhem bha ïa ka rynsan, mynta ki shipai IDF ki la buh ha ka jingïada ban khanglad ïa ka Hezbollah ban wanphai biang.
“Ka IDF kan dang sah ha ka jaka ba la buh kyrpang bad kan dang bteng ban pynjot ïa ki jingtei jong ki lehnoh bad ban pynthut ïa kano kano ka jingpyrshang jong ka Hezbollah ban seng biang ïalade,” u Netanyahu u la maham bad bynrap ba kano kano ka jinghiar thma ïa ki nongshong shnong ne ki shipai jong ka Israel yn ïakynduh da ka bor.
