Congo, Nailur:
Katkum ki kaphod ba la ioh lum, la iathuh bak a jingdon jong kiba ïap na ka jingpluh jong ka jhad kit mar ba don ka lama bar ri kaba la sahkut ha ka kad ieng jhad jong ka China ha ka Sngi Palei ka la kiew sha ka 25 ngut, kynthup sa ïa kiwei pat ki 5 ngut kiba la shah jer kyrteng ha ka thup jong kito kiba dang jah rngai hadien katei ka jingjia.
La ong ba katei ka jhad kit marbam, kaba la sahkut ha ka jaka ieng jhad kaba don sha ka phang Mihngi jong ka Qingdao, ka don 42 ngut ki briew ha ka por ba ka ding ka la klang, ong ka khubor jong ka tnat pynbna khubor jong katei ka ri.
Ia 17 ngut napdeng jongki baroh, la pynkynriah noh, kynthup ïa 5 ngut kiba la mynsaw.
Dei haduh ka por janmiet jong ka Sngi Palei ba la lap noh ïa baroh 25 ngut kiba jah, hynrei ym don jingkyrmen shuh namar baroh kiba la lap, dei ki bym iohi dak ring mynsiem ne don jingim shuh wat tang khyndiat ruh.
Shuh shuh ruh la iathuh ba ïa katei ka ding kaba khlang, la lah ban tehlakam bad pynlip noh tad haduh ka 2:30 nohphai sngi jong katei ka Sngi Palei.
Ka tnat pathai khubor jong katei ka nongbah, ka ‘Xinhua’, ka iathuh ba kham hashwa, katei ka jingpluh, ka la jia ha ka por kumba 11:15 baje mynstep, ha ka por ba katei ka jhad, ka dang khot ïa ka kad jhad, na ka bynta ban maramot, khlem da iathuh ïa ka daw jong katei ka jingpluh.
U nongsakhi na kawei ka jaka sah kaba marjan, u la iathuh ha ka AFP, ba u la iohi ïa ka tdem kaba rben kaba mih na katei ka jhad, hynrei um shym la iohsngew ïa ka jingbthei.
