Kolkata, Nailur:
U nongïalam jong ka kynhun pyrshah seng jong ka TMC uba dei ruh u MP jong ka Cooch Behar u Jagadish Chandra Barma Basunia ha ka lah sngi U Blei u la kam ba 17 ngut na ki 20 ngut ki MP jong ka Nationalist Citizens Party of India (NCPI) kin leit ban pynïasoh sha ka BJP la ka long shwa ne hadien ka Durga Puja ha u bnai Risaw.
Ka BJP ka la wad ban pynjngai ïalade na katei ka jingkynnoh, ha kaba u heh jong ka West Bengal unit jong ka, u Samik Bhattacharya, u la ong ba ka seng kan ym shim ïano ïano ruh tang namar ba ki kwah ban ïasoh bad ka.
U Basunia u la ong ba ki 17 ngut ki MP ki la rai ban ïasoh lang bad ka BJP, da kaba kynthoh ba kane ka jingleh jong ki kan ym khring ïa ka jingshah weng ha ka aiñ pyrshah ïa ka jingphet seng namar ba kin long palat ïa ka ar bynta na ka lai bynta jong ka bor jong ka NCPI.
“Ngi long 17 ngut ki MP kiba leit lang sha ka BJP. Namar ba palat ar bynta na ka lai bynta na ki 20 ngut kin sa kynriah, ka aiñ pyrshah phet seng kan ym treikam ïa ngi”, la ong u Basunia ha ki nongthoh khubor.
Ha ka 14 tarik u Jylliew, 20 ngut ki MP jong ka TMC kiba pyrshah, ki la pynbna ba kin ïasoh bad ka NCPI, kaba ym da tip bha bad ki la ai jingkyrshan ïa ka NDA kaba synshar. Ym duna ïa ka 14 ngut na ki 20 ngut ki MP kin hap ban pyndep ïa ka jingthew kaba ar bynta na ka lai bynta na ka bynta ka jingïada katkum ka aiñ pyrshah ïa ka jingphet seng.
Hynrei u Basunia u la ong ba lai ngut na ki MP, u Abu Taher Khan, u Khalilur Rahaman bad u Yusuf Pathan, kin ym pynïasoh sha ka BJP namar ka jingïaid lynti jong ka saiñ hima-sima bad ka jingsynshar ha ki konstitwensi jong ki. Ha ka jaka kata, kin ai jingkyrshan ïa ka NDA na shabar, u la kynnoh.
“Kin kyrshan ïa ka NDA, bad lah ban ai ïa ki jingkitkhlieh ne ki kam kiba kongsan”, la ong u Basunia.
Hynrei u para MP ka kynhun ba pyrshah seng u Satabdi Roy u la ong ba u Basunia u la kren ïa kitei ki jingkren ha ka kyrdan shimet jong u, bad ym shym la don satia kaba kum kata ka rai kaba la shim da katei ka kynhun haduh mynta.
Uwei pat u MP jong ka seng lehnoh, u Abu Taher Khan, uba dei ruh u dkhot jong ka kynhun NCPI, u la ong ba u Basunia um don hok satia ban kren na ka bynta baroh ki MP kiba la pynïasoh bad katei ka kynhun.
U la kyntait ruh ïa ka jingkam jong u Basunia ba ma u lem bad u MP ka Jangipur u Khalilur Rahaman bad u MP ka Baharampur u Yusuf Pathan kin kyrshan ïa ka NDA ba la ïalam da ka BJP katba kin sah shabar jong ka BJP.
“Ngin ym leit sha ka BJP. Ngin ym leit sha ka NDA. Kane ka long kaba shai bha,” la ong u Taher bad bynrap ba ka jingkren jong u Basunia ka dei ka jingsngew jong u shimet. Katba ka BJP pat ka la pynjngai ïalade na katei ka jingkynnoh.
U nongaiktien ka BJP ka West Bengal, u Debjit Sarkar, u la ong ba um don jingtip eiei halor kano kano ka jingjia bad u la pynskhem ba u briew uba pynpaw ïa ka jingkwah ban rung sha ka BJP kam mut ba ka seng kan shim hi dalade ïa u.
U Bhattacharya u la ong ba ka party kan ym shim ïano ïano ruh tang namar ba ki kwah ban pynïasoh, bad buh jingkylli hato ka BJP ba u Basunia u kdew ka dei “ka BJP ha Mars”.
“Katkum ka jingtip jong nga, ym don uwei ruh na ka TMC ne NCPI uba leit ban pynïasoh sha ka BJP. Ki briew ka jylla kim pat klet ïa ki jait kam sniew kiba kine ki nongïalam bad ki MP ki la leh ha ka por ba synshar ka TMC,” u la ong.
