New Delhi, Nailur:
Ka Myntri Rangbah jong ka Delhi, ka Rekha Gupta, ka la pynbna ba ki jingtreikam jong kiba bun ki projek ki long ban wanrah ïa ka roi ka par bad ka jingbha ha ka imlang ka sahlang, ha kaba ïadei bad kane, ka la khmih bniah ha kaba ïadei bad ki khynnah pule, kiba kynthup ïa kiba don ha ki kyrdan ba kham shalor bad khamtam ïa kiba ha ki jingpule kiba dang rit.
Ha kaba ïadei bad kane ka jingthmu, ka sorkar ka la wanrah ïa ki lad ban ai jingmyntoi bad kyrshan ïa ki skul ha Delhi bad ban wanrah ka jingshngaiñ ïa ki khynnah skul.
Ha ka sienjam ban pyndap ïa ki skul sorkar ha ka nongbah jong ka ri da ki jingtei kiba mynta, ban kyntiew ïa ka jingshngaiñ jong ki khynnah skul bad ban pynbha ïa ki jingdonkam, 75 tylli ki Skul CM SHRI kin ïaid lyngba ki jingpynbha, bad ki jingkyntiew sha ki kyrdan kiba kham shalor.
Yn pynwandur ïa ki jaka thymmai kum shi bynta jong kane ka jingthmu. Ïa ka jingtyrwa kaba shongdor kumba 265 klur tyngka la mynjur ha ka jingïalang jong ka komiti pynlut pisa kaba dang shen kaba la pynïaid da ka Myntri Rangbah ka jylla ka Rekha Gupta.
Ka Gupta ka la kdew, “Hapoh kane ka projek, yn shna thymmai, pynbha bad pynitynnad ïa ki khyrdop rung skul ha ka rukom kaba mynta. Kin pyni ïa ka dak thymmai jong ka CM SHRI ryngkat bad ka kyrteng jong ka skul.”
Ka projek kan kynthup ruh ïa ka jingkhanglad jong ka jingsngem ha ki ïing skul, ka jingai rong hapoh bad shabar, ka jingpynbha ïa ka plaster bad ka jingshna ne jingpynbha ïa ki kynroh bad ka jingker.
Kan kynthup ruh ïa ka jingpynbha ïa ki paiñkhana & ki jaka ai um dih, ka jingpynbha ïa ki jaka pyntuid jaboh bad ki jaka pyntuid um, ka jingpynroi ïa ki jingïalehkai lada donkam, ka jingpynbha ïa ki jaka pyllang um slap bad ka jingpynthymmai ïa ki hall ba pyndonkam bun jait.
Ki kam ba ïadei bad ka bording kin kynthup ïa ki lad jingïada na ka ding. Yn bujli noh ïa ki LED Light kiba la sniew, ki Ceiling fan, ki fan pynmih lyer bad ka kor pynbna khubor paidbah.
